( විනීතා එම් ගමගේ)

ජාඇල- ඒකල පොලිටෙක්ස් කම්හලේ ඉකුත් සිකුරාදා ඇතිවූ හදිසි ගෑස් කාන්දුවට හේතුව එහි සම්පීඩක යන්ත‍්‍රයක ඇති වූ කාර්මික දෝෂයක් හේතුවෙන් එහි ලිහිසි තෙල් අධික රත්වීමකට ලක්වීමෙන් ඇතිවූ වායුවක් යැයි හඳුනා ගෙන ඇත. 

එය මාරාන්තික හෝ යම් බරපතල තත්ත්වයක් ඇති කරන වායුවක් නොවෙන බව තහවුරු කර ගත් බව කම්කරු දෙපාර්තමේන්තුවේ වෘත්තිය ස්වස්ථතා අංශයේ නියෝජ්‍ය කම්කරු කොමසාරිස් වෛද්‍ය වජිර පලිපාන මහතා පැවැසීය.

එම කම්හලේ අදාල ස්ථානයන්හි කළ ස්ථානිය පරික්ෂාවන් හා විමර්ශනයකින් පසු මේ පිළිබඳ වාර්තාවක් කම්කරු වෘත්තිය සමිති සබඳතා සහ සබරගමුව සංවර්ධන අමාත්‍ය ඩබ්ලිව් ඞී ජේ සෙනෙවිරත්න මහතා වෙත භාර දුන් බවත් අධිකරණයට ද තත්ත්වය වාර්තා කරන බවත් හෙතෙම කියා සිටියේය.  

එම ඇඟළුම් කම්හල ලබන සඳුදා යළි විවෘත කිරීමට අවසර දිය හැකි බවට  අධිකරණයට  වාර්තා කරන බවද  වෛද්‍ය වජිර පලිපාන කියා සිටියේය.

කෙසේ වෙතත් මේ වනවිට අදාළ කම්ප්‍රෙෂර් යන්ත‍්‍ර ඉවත්කොට නව යන්ත‍්‍ර සවිකොට ඇති බවත් ඒවායේ වායු ගෙන යන බට සියල්ල පිරිසිදු කර ඇති බවත් ඊයේ (23) එහි කළ නිරීක්ෂණ චාරිකාවේ තහවුරු කරගත් බව  හෙතෙම කියා සිටියේය.