(උපාලි ආනන්ද) 
 
 ඇසිඩ් ප්‍රහාරයක් එල්ල කළැයි කියන විත්තිකරුවන් පිරිසකගෙන් රුපියල් කෝටි පහමාරක් ඉල්ලා උතුරු මැද පළාත් ආයුර්වේද කොමසාරිස්වරයා  පවරා ඇති නඩුව සැප්තැම්බර් මස 24 වනදා විභාගයට ගැනීමට අනුරාධපුර දිසා විනිසුරු සහ අතිරේක මහේස්ත්‍රාත් මනෝජ්  තල්ගොඩපිටිය මහතා   අද  නියෝග කළේය.
 
 උතුරු මැද පළාත් ආයුර්වේද කොමසාරිස් වෛද්‍ය කුමාර අල්විස් මහතා ජනාධිපති  නීතිඥ කරුනාරත්න හේරත් මහතා මගින් අනුරාධර දිසා අධිකරණය හමුවේ ගොනු  කර ඇති නඩුවක්   සලකා බැලූ අවස්ථාවේදී විනිසුරුවරයා මෙම නියෝගය කළේය.
 
රෝගියෙකුට ප්‍රතිකාර ලබා ගැනීමේ මුවාවෙන් පැමිණ තමාට ඇසිඞ් ප්‍රහාරයක් එල්ල කර එක් ඇසක් අන්ධ කර අනෙක් ඇසට සහ  ශරීරයේ ස්ථාන කිහිපයකට බරපතල තුවාල සිදු කිරීම නිසා සිදු වූ හානිය  වෙනුවෙන් රුපියල් කෝටි පහමාරක් ඉල්ලා  ආයුර්වේද වෛද්‍යවරයෙකු ඇතුළු විත්තිකරුවන්  තිදෙනකුට එරෙහිව මෙම නඩුව පවරා තිබේ.
 
මින්නේරිය අයුර්වේද රෝහලේ වෛද්‍යවරයෙකු වූ   සුසිරි කුමාර වික්‍රමසිංහ, හිටපු යුද හමුදා සෙබලකු වන  නුවන් කුමාර සහ මාලූ වෙළෙන්දෙකු වන   කෝෂිත හෂාන් යන තිදෙනා විත්තිකරුවෝය.