(අංජුල මහික වීරරත්න)

”රජය කරන හොඳ වැඩවලදී ප‍්‍රශංසා කරන්න. එසේ නැති තැන විවේචනය කරන්න” යැයි අග‍්‍රාමාත්‍ය රනිල් වික‍්‍රමසිංහ මහතා අරලියගහ මන්දිරයේදී පුරවැසි බලය සංවිධානයේ සාමාජික සාමාජිකාවන්ගෙන් ඉල්ලා සිටියේය.

ගැටලූ සියල්ලට පැලැස්තර නොදමා ස්ථිර විසඳුම් සෙවීම යන පදනමෙහි සිට රජය කටයුතු කරන බව ද අගමැති රනිල් වික‍්‍රමසිංහ මහතා එහිදී අවධාරණය කළේය.

පුරවැසි බලය සංවිධානයේ සාමාජික සාමාජිකාවෝ කොළඹ අරලියගහ මන්දිරයේදී අග‍්‍රාමාත්‍ය රනිල් වික‍්‍රමසිංහ මහතා හමුවූහ.

එහිදී තවදුරටත් අදහස් දැක්වූ රනිල් වික‍්‍රමසිංහ මහතා මෙසේ ද කීය.

”රටේ යහපාලනය ඇති කරන්න, විශේෂයෙන්ම මෛත‍්‍රීපාල සිරිසේන මැතිතුමා ජනාධිපති ලෙස පත්කර ගැනීමට සංවිධානය ලෙස ඔබ සියලූ දෙනා එක්ව වැඩ කළා. අප සාකච්ඡා කර එකඟ වූ කරුණු සම්බන්ධයෙන් ක‍්‍රියාත්මක වෙන්නේ කෙසේදැයි ඔබ දැන් මගෙන් විමසනවා.

කරුණු ක‍්‍රියාවට නැංවීම වේගවත් මදි බව ඇතැම් ස්ථානවල ඔබ පවසා තිබෙනවා. අද නිදහසේ සමාජය ස්ථාපිත වෙලා. ඒ නිසා අද මාධ්‍යයෙන් කොතරම් පහර ගසනවා ද? එසේ වූවත් කවුරුවත් මාධ්‍යවේදීන් පැහැර ගෙන ගොස් නැහැ.

එදා ප‍්‍රජාතන්ත‍්‍රවාදය ගැන පැවැසූ පුද්ගලයන් අද අපට දොස් කියනවා. නමුත් මෙයයි ප‍්‍රජාතන්ත‍්‍රවාදය.

 ඕනෑම අයකුට  ඕනෑම දෙයක් කිව හැකියි. ඒවාට අපට පිළිතුරු දෙන්නත් පුළුවනි. අප ගහන්න යන්නේ නැහැ. ප‍්‍රජාතන්ත‍්‍රවාදී නිදහස් වාතාවරණය ඉදිරියට ගෙන යා යුතුයි. අප මේ වනවිට රටේ පවතින මූලික ගැටලූ විසඳීම ආරම්භ කර තිබෙනවා.

ඔබ මතක තබා ගන්න. අපට ලැබුණේ ණය බර සහිත මඩවගුරයි. එක් පැත්තකින් මඩවගුර ලැබුණා. අනෙක් පැත්තෙන් කුණු කන්දක් ලැබුණා. තවත් පැත්තකින් හොර ගුහාව ලැබුණා. මේ සියල්ලම පාලනය කරමින් අප ඉදිරියට යන්නේ කෙසේ ද?

සෑම ගැටලූවක් සඳහාම අපි පියවර ගෙන තිබෙනවා. ණය උගුලට මුහුණ දෙනවා. ඒ වගේම නියඟය, ගංවතුර ආදී ආපදා තත්ත්වයන්ටත් මුහුණ දුන්නා. මේ ගැටලූ සියල්ලට තාවකාලික පැලැස්තර නොදමා ස්ථිර විසඳුම් සෙවිය යුතුයි.

කසළ එකතුවීමේ ගැටලූව විසඳීමට නම් කසළ කළමනාකරණය කිරීමේ වැඩසටහනක් තිබිය යුතුයි.

දුෂණය, වංචා පිළිබඳව ඔබ මගෙන් විමසුවා. ඒ පිළිබඳව විභාග කිරීම් ගණනාවක් මේ වනවිට වනවා. ඒ වගේම පොලිසියෙන් විමර්ශනය කර අවසන් කරන ලද ඇතැම් විභාග කිරීම් නීතිපති දෙපාර්තමේන්තුවටත් යවා තිබෙනවා. ඉන් කොටසක් මේ වනවිට අධිකරණයටත් භාර දී අවසානයි. අප කරන විශාල වැඩ කොටස ජනතාවට පවසන්නේ නැතැයි බොහෝ අය දොස් කිව්වා. ඒ නිසා ඉදිරියේදී සියලූ කරුණු ජනතාවට හෙළි කරනවා.

රටේ ආර්ථිකය ඉදිරියට ගෙන යමින් රැකියා අවස්ථා බිහි කිරීම මගේ කාර්ය භාරයයි. අධ්‍යාපනය දියුණු කරමින් ජනතාවට සහන සැලසිය යුතුයි. මේ කරුණු සම්බන්ධයෙන් අවධානය යොමු කරමින් සිටිනවා.

විශේෂයෙන්ම ජනතාවට සහන සැලසීම, ඔවුන්ගේ ආර්ථිකය දියුණු කිරීමේ වැඩපිළිවෙළ ආදියට අපේ අවධානය යොමු වී තිබෙනවා.

සියලූ දෙනාගේ අදහස් සලකා බලමින් රටේ නව ව්‍යවස්ථාවේ මූලික වර්තාව සැකසීමට බලාපොරොත්තු වෙනවා. එක් මසක් තුළ සති දෙකක කාලයකදී දේශපාලන පක්‍ෂවල සියලූ නියෝජිතයන් පාර්ලිමේන්තුවේදී මා මුණ ගැසෙනවා. නව ව්‍යවස්ථාව සැකසීමේදී විශාල වෙනස්කම් කිරීමට ඇති නිසා එහිදී සියලූ දෙනා සමඟ විශාල වශයෙන් සාකච්ඡා කිරීමෙන් අනතුරුව මූලධර්ම ගණනාවකට එකඟවීමට හැකියාව ලැබුණා.

මේ වැඩ කටයුතු කරන විට ඇතැම් අය පවසන්නේ රටේ ඒකීයභාවය, බුදු දහම අනතුරට පත්වන බවයි. එසේ වන්නේ නැහැ. බුදු දහමට ප‍්‍රමුඛස්ථානය දෙන අතරම, රටේ අනෙකුත් කිසිදු ආගමකට මදි පුංචිකමක් නොකරන බවට ජනාධිපතිතුමාත්, මමත් අනෙක් පක්‍ෂ සියල්ලමත් එකඟ වූවා.

අස්ගිරි - මල්වතු පාර්ශ්ව අතර ගැටුම ඇති කර නිකායන් අතර සමගිය කැඞීමටත් ඇතැමුන් එදා උත්සාහ කළා. සංඝ භේදය ඇති කිරීමට උත්සාහ ගත්තා. ඒවා ගැන කවුරුවත් කතා කරන්නේ නැහැ.

බුදු දහම අනතුරේ යයි පවසන පිරිස් මල්වතු පාර්ශ්වයට කළ තර්ජනය හෙළා දකිනවා ද නැද්ද?

පක්‍ෂ ගණනාවක් දේශපාලනිකව එකතු වුණේ මේ ගැටලූ නිසයි. එසේ නැතිනම් අප දේශපාලන වශයෙන් විරුද්ධවාදී පක්‍ෂයි. විශේෂයෙන්ම ප‍්‍රධාන පක්‍ෂ දෙකක්, සුළු පක්‍ෂත් එකතු වුණා. එහිදී සම්පන්දන් මැතිතුමාත් අපේ උදව්වට පැමිණි බව කිව යුතුයි. ඒ නිසා ආගම්වාදයට හෝ ජාතිවාදයට හෝ ඉඩ නොදී ඔබතුමන්ලා වැඩකටයුතු ඉදිරියට කරන්න. එය අපට ප‍්‍රශ්නයක් නොවෙයි.

ඒ වගේම උතුරේ ජනතාවට සහන දීමට තිබෙනවා. අප උතුරේ ජනතාව සමඟ සංහිඳියාව ඇති කරගත යුතුයි. ඉතා ඉවසීමෙන් අප ඔවුන් සමඟ වැඩ කරනවා. එසේම වේගය වැඩි කරමින් අපත් ඉදිරියට යා යුතුයි. දේශපාලන වාතාවරණය අනුවයි අප වැඩ කටයුතු කරන්නේ.

මේ සම්බන්ධයෙන් අපට දීර්ඝ වශයෙන් සාකච්ඡා කිරීමට අවස්ථාව ලැබුණා. ඔබේ අදහස ප‍්‍රකාශ කිරීමේ අයිතිය ඔබට තිබෙනවා. ඊට අපෙන් බාධාවක් නැහැ. අද තිබෙන්නේ නිදහස් සමාජයයි. වෙන කාටවත් ඔබට හිරිහැර කිරීමට අවස්ථාවක් දෙන්නේ නැහැ.

ඔබ අපත් සමඟ එක්ව සටන් කළේ නිදහස් සමාජය බිහි කිරීමටයි. අප කරන හොඳ වැඩවලදී ප‍්‍රශංසා කරන්න. එසේ නැති තැන විවේචනය කරන්න. ඒ වගේම මීට පෙරත් මා පවසා ඇති පරිදි ඇතැම් කාර්යයන් කිරීමට යම් කාලයක් ගත වනවා. නමුත් මූලික වැඩ කටයුතු සියල්ල මේ වනවිට ආරම්භ කර තිබෙනවා.

ජනාධිපතිවරණ ව්‍යාපාරයේ අපත් සමඟ එක්ව වැඩ කටයුතු කළ රටේ නිදහස සහ ජාතික එකමුතුව තහවුරු කිරීමට කටයුතු කරන ඔබ සියලූ දෙනාටත් පුරවැසිබලයටත් මා ස්තුති කරනවා” යයි ද රනිල් වික‍්‍රමසිංහ මහතා වැඩිදුරටත් පැවැසීය.