(විනීතා එම් ගමගේ)

‘‘ඇඟට පතට නොදැනී, පහසු ලෙස කොළ කෑලි අරන් ගිහින් දීල මේ ආණ්ඩුව පෙරලන්න  බැරි බව වටහා ගෙන ඒකාබද්ධ විපක්ෂය කටයුතු කළා නම් විශ්වාසභංගය දිනාගන්නට  ඕනැ තරම් ඉඩ තිබුණා.’’ යයි ජාතික සංවිධාන එකමුතුවේ විධායක කමිටු සාමාජික වෛද්‍ය වසන්ත බණ්ඩාර මහතා පැවැසීය. 

ජනතාව ඡන්දයේ දී දුන් බලය ඉදිරියට ගෙන යන්නට අවශ්‍ය බව ඒකාබද්ධ විපක්ෂය කල්පනා කළේ නැතැයි ද හෙතෙම කියා සිටියේය. 

මේ ආණඩුව පෙරලන්නට නම් අති විශාල ජනතා බලවේගයක් මහපාරට බැස්ස විය යුතුයැයි ද ඔහු සඳහන් කළේය. 

වෛද්‍ය වසන්ත බණ්ඩාර මහතා මේ අදහස් පළ කළේ රාජගිරිය, නාවල පාරේ පිහිටි ජාතික සංවිධාන එකමුතුවේ ප‍්‍රධාන කාර්යාලයේ අද (05) පැවැති මාධ්‍ය හමුවක් අමතමිනි. එහි දී තව දුරටත් අදහස් දැක්වූ බණ්ඩාර මහතා මෙසේ ද කීය.

‘‘පක්ෂය තුළ ඇති වූ පිඩනය නිසාම මතු වූ විශ්වාස භංගය කොහොමද රනිල් ජයගන්න තැනට ගෙන ගියේ කියල බැලූවම පේනවා වුණ දේ. 2013 දි බෙදුම්වාදි පක්ෂ රනිල් වික‍්‍රමසිංහ මහතා සමඟ එකඟ වී තිබුණේ ඒ ඒ අය ඉදිරිපත් කරන කරුණු වලට එකඟ වන්නේ නම් ඔහු බලයට ගෙන එන්නට උදව් කරන බවයි. 

රවුෆ් හකීම් මහතා සමඟ කරුණු 67 කට එකඟ වුනා. එයින් ඉතුරු වෙලා තියෙන්නේ ව්‍යවස්ථාව ගෙන ඒම පමණයි. 

මේ වනවිට අතුරුදන් වූවන්ගේ කාර්යාලය විවෘත කරන්න අතුරුදන් කරවීම් වැළැක්වීමේ පනත ගෙන එන්න සුදානම්. මේ දෙක එකට ආවාම සර්වලෝක අධිකරණ බලය තරම් බලයක් තියෙනවා. මේ රටේ මුල්‍ය පද්ධතිය වෙනස් කරන්න, නීති පද්ධතිය වෙනස් කරන්න, කොටින්ගේ  ගැහිල්ල නීති ගත කරන්න අවස්ථාව ලබා දුන්නා.                                                                                                          
මෙහෙම කුමන්ත‍්‍රණ වලින්  බලය තියා ගත්තට මේ ආණ්ඩුවට ඡන්දයකින් නම් දිනා බලයට එන්නට ලැබෙන්නේ නැහැ. ’’ යැයි ද වසන්ත බණ්ඩාර මහතා කීය.