(දයාරත්න ඇඹෝගම)
 
ශ්‍රී ලංකා පොදුජන පෙරමුණේ ජන ගඟට බිය වී පළාත් පාලන මැතිවරණය කල් තැබීමට යහපාලන ආණ්ඩුව කටයුතු කරනවා නම් සල්ගාදු පිටියට නොදෙවිණි ජන ගඟක් සමඟ මැතිවරණය ඉල්ලා දිස්ත්‍රික් මට්ටමින් පාරට බැසීමට වුවද ඒකාබද්ධ විපක්ෂය හා ශ්‍රී ලංකා පොදුජන පෙරමුණ සුදානම් බව උතුරු මැද පළාත් සභාවේ හිටපු ප්‍රධාන අමාත්‍ය එස්.එම්.රංජිත් සමරකෝන් මහතා අද (17) පැවසීය.
 
යහපාලන ආණ්ඩුවේ අමාත්‍යධුර දරණ ඇමැතිවරුන් කිහිප දෙනකුගේ සමීපතයන් පිරිසක් විසින් පළාත් පාලන මැතිවරණය කල් තැබීම සඳහා අධිකරණයට යාම සම්බන්ධයෙන් ඔහු ගෙන් විමසු අවස්ථාවේ හෙතෙම මේ බව කීය.
 
අපි දැනගෙන හිටියා අනුරාධපුරයේ ජන රැලියෙන් පසුව පළාත් පාළන මැතිවරණය කල් දැමීමට ආණ්ඩුව කටයුතු කරනවයි කියන එක.එදා අපි වේදිකාවෙත් මේ කතාව කිව්වා.අද එය සැබෑවක් බවට පත් වෙලා තිබෙනවා.ජන වරමක් නොමැතිව මැතිවරණයකට යන්නට බෑ තමයි.අපි ඒක පිළිගන්නවා.
 
මැතිවරණය ඉදිරියේ තබාගෙන මංගලගේ මංගල අයවැයෙන් ජනතාව අතරට යන්නට බලන් හිටපු ශ්‍රී ලංකා නිදහස් පක්ෂයේ සහ එක්සත් ජාතික පක්ෂයේ ගමේ නායකයින්ගේ බලාපොරොත්තු සියල්ල මේ වන විට සුන් වෙලා ගිහින්. 
 
දැන් අයවැයෙන් ගොවියාට කම්කරුවාට, රජයේ සේවකයාට සහනයක් ලැබුණේ නෑ. කුස්සියේ අර්බුදය දවසින් දවස වර්ධනය වෙනවා.ඒ තුළ ගමට බැස ගන්නට බැරි පාලකයින්ට මොන ගැටයකින් හෝ ඡන්දය කල් දමනවා හැරෙන්නට වෙන කරන්නට දෙයක් නැතැයි ද හෙතෙම වැඩි දුරටත් පැවසීය.