(*** අංජුල මහික වීරරත්න)

බොරු කියා බලයට පැමිණි ප්‍රතිපත්තියක් නැති ආණ්ඩුව පිළිබඳව ජනතා විශ්වාසය මේ වනවිට අන්තිමටම පිරිහී ඇතැයි එක්සත් ජාතික පක්‍ෂ නියෝජ්‍ය මහලේකම්, කැලණිය ආසනයේ ප්‍රධාන සංවිධායක රුවන් විජයවර්ධන මහතා ජාඇල දී පැවසීය.

කොරෝනා වසංගතය පිළිබඳ සත්‍ය තොරතුරු වසන් කර, සෞඛ්‍ය නිර්දේශ පවා බැහැර කරමින් බලලෝභී වුවමනා වෙනුවෙන් ආණ්ඩුව ජන ජීවිත අනතුරේ හෙළා අවසානැයිද රුවන් විජයවර්ධන මහතා සඳහන් කළේය.

මහ මැතිවරණය වෙනුවෙන් ජාඇල ප්‍රදේශයේ පැවති රැලියකදී තවදුරටත් අදහස් දැක්වූ රුවන් විජයවර්ධන මහතා මෙසේද කීවේය.

“රටේ ආර්ථිකය ගොඩනැගීම සඳහා හෝ කොරෝනා වසංගතයෙන් ජන ජීවිත ආරක්‍ෂා කරගැනීමට හෝ රජයට කිසිදු ප්‍රතිපත්තියක් නැහැ.
කොරෝනා ආසාදිතයන් සම්බන්ධයෙන් තොරතුරු වසන් කරමින් රජය කටයුතු කරන බවට මේ වනවිට ජනතාව තුළ විශාල සැකයක් මතුවෙලා. ශ්‍රී ජයවර්ධනපුර විශ්වවිද්‍යාලය කොරෝනා ආසාදිතයින් හඳුනා ගැනීම සඳහා පී.සී.ආර්. පරීක්‍ෂණ පැවැත්වීමෙන් ඉවත් වූයේ ඇයි? ඊට හේතුව රජය සත්‍ය තොරතුරු වසන් කිරීමයි.

මේ වනවිට කොරෝනා වසංගතය සම්බන්ධයෙන් වෛද්‍යවරුන් සහ සෞඛ්‍ය බලධාරීන්ගේ නිර්දේශ රජය බැහැර කරමින් කටයුතු කරන තත්ත්වය නිර්මාණය වෙලා. මේ තත්ත්වය තුළ සෞඛ්‍ය අංශයට සම්බන්ධ ඇතැම් නිලධාරීන් රාජකාරියෙන් පවා ඉවත් වූවා.

බලයට ඇති කෑදරකම හේතුවෙන් මැතිවරණය පසුපස දිවයන ආණ්ඩුවට ජනතාවගේ ජීවිතවල සුරක්ෂිත බව පිළිබඳ වගකීම අමතක වෙලා.

එක්සත් ජාතික පක්‍ෂයෙන් ඉවත්ව මෙවර මැතිවරණයට ඉදිරිපත් වන ඇතැම් කණ්ඩායම් එක්සත් ජාතික පක්‍ෂ නායකත්වයත්, පක්‍ෂ මූලස්ථානයත් ඇල්ලීම පිළිබඳ කතා කරමින් යන නමුත් රටේ උන්නතිය වෙනුවෙන් අවශ්‍ය ආර්ථික සහ දේශපාලනික දැක්ම ඉදිරිපත් කිරීමට මෙතෙක් අපොහොසත් වෙලා.

ජනතාවට වැදගත් වන්නේ පක්‍ෂ ගොඩනැගිලි අත්පත් කර ගැනීම නොව රට වෙනුවෙන් ක්‍රියාවට නංවන දේශපාලන ප්‍රතිපත්ති” බවද එක්සත් ජාතික පක්‍ෂ නියෝජ්‍ය මහලේකම් රුවන් විජයවර්ධන මහතා පැවසීය.

මේ අවස්ථාවට හිටපු අමාත්‍ය ජෝන් අමරතුංග, මහ මැතිවරණ අපේක්‍ෂක අර්ජුන රණතුංග යන මහත්වරු ද සහභාගි වූහ.