මුදිතා දයානන්ද                            

             
අධ්‍යාපන අමත්‍යාංශය ඉදිරිපිටදී ගුරු විදුහල්පතිවරුන්ට එල්ල කළ අමානුෂික ප‍්‍රහාරය තරයේ හෙළා දකින බව එක්සත් ජනතා නිදහස් සන්ධාන පාර්ලිමේන්තු මන්ත‍්‍රී සිසිර ජයකොඩි මහතා අද (5) පැවසීය.

ජයකොඩි මහතා මේ බව සඳහන් කළේ බත්තරමුල්ල, නෙලූම් මාවතේ පිහිටි ශ්‍රී ලංකා පොදුජන පෙරමුණේ ප‍්‍රධාන කාර්යාලයේ දී පැවති මාධ්‍ය හමුවකදී අදහස් දක්වමින් ඔහු තවදුරටත් මෙසේද පැවසීය.

දේශපාලන පළිගැනීම්වලට ලක්වුවන්ට සාධාරණය ඉෂ්ට කරන්න කියලා මේ ආණ්ඩුව තමන්ගේ පිරිසකට දේශපාලන උසස්වීම් ලබාදී තිබෙනවා. දේශපාලන පළිගැනීම්වලට ලක්වූවන්ගේ පැමිණිලි විභාග කිරිමට පත්කළ කමිටුවේ සාමාජිකයන් තමන්ටම උසස්විම් දෙන්න නිර්දේශ කරලා.

ඒ අයට මේ තනතුරුවලට පත්විමට සුදුසුකම් නැහැ. ඒ නිසා තමයි ගුරුවරු ඊයේ වැඩවර්ජනයක් ආරම්භ කරලා ඉසුරුපාය ඉදිරිපිට උද්ඝෝෂණයක් සිදුකළේ. එතනදී උසස්වීම් ලබාගත්ත ගුරුරවැන් ලවාම උද්ඝෝෂණය කළ ගුරුවරුන්ට පහර දුන්නා. 

මේ පහරදීම සිදුකලේ පාසල්වල පරිපාලනය භාර විදුහල්පතිවරුන්ට හා ගුරුවරුන්ට. ඒ නිසා මේක ඔවුන්ගේ ගෞරවය කෙලෙසීමක් හැටියටයි අපි දකින්නේ. ආණ්ඩුව හදන්නේ අධ්‍යාපන ක්ෂේත‍්‍රය කඩා වට්ටන්නයි.

සුදුසුකම් නැති අය අධ්‍යාපන ක්ෂේත‍්‍රයේ ඉහළ තනතුරුවලට පත් කිරිමෙන් අධ්‍යාපනය අවුල් වෙනවා. මෙවැනි පත්වීම් ඉතිහාසයේත් ලබාදී තිබෙනවා. එදා සිටම කළ ඒ දේවල් නිසා තමයි අධ්‍යාපනය කඩා වැටෙන්නේ.