(විනීතා එම් ගමගේ)

වස විස නැති ගොවිතැන පිළිගන්නා බව කොන්ද පණ ඇතිව පොරොන්දු වන නායකයෙක් රාජ්‍ය නායකයා කරගන්නට ඊළඟ මැතිවරණයේ දී ගිවිසුම් ගත කරගෙන සහය දක්වන බව පාර්ලිමේන්තු මන්ත‍්‍රී අතුරලියේ රතන හිමියෝ පැවැසූහ.

ඒ සඳහා ශක්තිමත්ව කටයුතු කරන ජනතා ව්‍යාපාරයක් වෙනුවෙන් සමාජය සුදානම් කරමින් පවතින බව ද උන්වහන්සේ කීහ.

පළාත් පාලන ඡන්දය පැරදුනේ පොහොර වෙනුවට මුදල් දුන් නිසා බව දේශපාලකයන් පවසන්නේ යැයි කී උන්වහන්සේ එසේ නම් කෘති‍්‍රම පොහොර දී ඊළඟ ඡන්දය දිනන්නට සුදානම් වන්නැයි දේශපාලකයන්ට අභියෝග කරන බව ද පැවැසූහ.

පොහොර සහනාධාරය දෙන්නට ආණ්ඩුව කටයුතු කරන්නේ නම් කැමති අයට  පමණක් වත් මුදල් දෙන ලෙස තමන් කෘෂිකර්ම අමාත්‍යංශ ලේකම්වරයාගෙන් ඉල්ලා සිටි බවත් ඔහු ඊට එකඟ වූ බවත් කී රතන හිමියෝ ඒ අනුව කැමති අයකුට කෘත‍්‍රිම පොහොර වෙනුවට කාබනික පොහොර ලබාගත හැකි බව ද සඳහන් කළහ.

වස පොහොර එපා යැයි කියන ගොවීන් ලියාපදිංචි කිරීමේ ව්‍යාපාරයක් ආරම්භ කර ඇති බවත් ගොවීන් එහි ලියාපදිංචිකර ගැනීම ආරම්භ කර ඇති බවත් උන් වහන්සේ පැවැසූහ.

රතන හිමියෝ මේ අදහස් පළ කළේ බණ්ඩාරනායක අනුස්මරණ ජාත්‍යන්තර සම්මන්ත‍්‍රණ ශාලාවේ ඊයේ (24) පැවැති උත්සවයක දීය. වස විස නැති රටක් වැඩපිළිවෙළ අරඹා වසර දෙකක් ගතවීම නිමිත්තෙන් එහි ප‍්‍රගතිය පිළිබඳ සාකච්ඡා කිරීම සඳහා මෙම හමුව පැවැත්විණි.