(ඩයනා උදයංගනී)
 
මධ්‍යම බෙංගාල බොක්ක මුහුදු ප්‍රදේශයේ, ශ්‍රී ලංකාවට ඊසාන දෙසින් පවතින ‘ෆොනී’ චණ්ඩ සුළි කුණාටුවේ බලපෑම හේතුවෙන් තුළ අද (02) සිට අනිද්දා (04) දක්වා මන්නාරම සිට කොළඹ, ගාල්ල හරහා පොතුවිල් දක්වා වෙරළ ආසන්න මුහුදු ප්‍රදේශවල මුහුදු රළ මීටර් 2.5 සිට 3.5 ක් දක්වා ඉහළ යාමේ හැකියාවක් පවතින බව කාලගුණවිද්‍යා දෙපාර්තමේන්තුව පවසයි.
 
මේ හේතුවෙන් මුහුදු රළ ගොඩබිමට පැමිණිය හැකි බවද එම දෙපාර්තමේන්තුව සඳහන් කරයි.

එම ප්‍රදේශවල මුහුද රළුවිය හැකි බව ද එම එම දෙපාර්තමේන්තුවේ ප්‍රකාශකයෙක් පැවසීය.

මන්නාරම සිට කොළඹ, ගාල්ල හරහා පොතුවිල් දක්වා වන කලාපයේ වෙරළාසන්නයේ ජීවත් වන ජනතාව, ධීවර සහ නාවුක කටයුතුවල නිරතවන ජනතාව මේ පිළිබදව අවධානයෙන් සිටිය යුතු එම ප්‍රකාශකයා සඳහන් කළේය.
 
මේ හේතුවෙන් හදිසි තත්වයක් ඇතිවුවහොත් 117 යන හදිසි ඇමතුම් අංකය අමතන ලෙස ආපදා කළමනාකරණ මධ්‍යස්ථානය මහජනතාවට දැනුම්දීමක් කර තිබේ.
 
මධ්‍යම බෙංගාල බොක්ක මුහුදු ප්‍රදේශයේ, ශ්‍රී ලංකාවට ඊසාන දෙසින් පවතින අතිශයින් චන්ඩ  ‘ෆොනී’ සුළි කුණාටුව අද (02) යාපනයට ඊසාන දෙසින් කි. මී. 750 ක් පමණ දුරින් ස්ථානගතව පවතින බව කාලගුණවිද්‍යා දෙපාර්තමේන්තුව නිවේදනය කර ඇත.
 
දිවයිනේ බොහෝ ප්‍රදේශවල විටින් විට වැසි හෝ ගිගුරුම් සහිත වැසි ඇතිවන අතර ඌව, සබරගමුව, මධ්‍යම, දකුණු, බස්නාහිර සහ වයඹ පළාත්වල සහ මන්නාරම දිස්ත්‍රික්කයේ සමහර ස්ථානවල මි.මී. 100 ක පමණ තද වර්ෂාපතනයන් ඇති විය හැකි බවද කාලගුණ විද්‍යා දෙපාර්තමේන්තුව පවසයි.