(මනෝප‍්‍රිය ගුණසේකර)

විදුලි රැහැන් වලට කොකු ගසා නිවෙස් වලට හොරෙන් විදුලිය ලබාගත් බව කියන මන්නාරම මුරුක්කන් හා සිලාවතුර ප‍්‍රදේශයේ පුද්ගලයින් 84 දෙනෙකු විදුලි බල මණ්ඩලයේ විශේෂ විමර්ශන ඒකකය හා මන්නාරම පොලිසිය එක්ව සිදුකළ මෙහෙයුමකදී අත්අඩංගුවට ගෙන ඇත.

විදුලි බල මණ්ඩලයේ විශේෂ විමර්ශන ඒකකයේ කළමණාකාර ඉන්දික ප‍්‍රනාන්දු මහතාට ලැබුණු තොරතුරකට අනුව විදුලි බල මණ්ඩලයේ විශේෂ විමර්ශන ඒකකය හා මන්නාරම පොලිසිය එක්ව සිදුකළ වැටලීමකදී මෙම සැකකරුවන් අත්අඩංගුවට ගෙන තිබේ.

මන්නාරම ප‍්‍රදේශයේ ජීවත්වන පුද්ගලයින් වංචනික ක‍්‍රම මඟින් විදුලිය ලබාගන්නා බවට විදුලි බල මණ්ඩලයේ විශේෂ විමර්ශන ඒකකයේ කළමණාකාර ඉන්දික ප‍්‍රනාන්දු මහතාට ලැබුණු රහසිගත තොරතුරකට අනුව සති කිහිපයක් තිස්සේ බුද්ධි තොරතුරු රැස්කිරීමෙන් අනතුරුව අද (1) අලුයම 1.00ට පමණ මන්නාරම මුරුක්කන් හා සිලාවතුර ප‍්‍රදේශයේ සෝදිසි මෙහෙයුමක් ආරම්භ කර ඇති අතර එහිදී වංචනික ක‍්‍රම මඟින් විදුලිය ලබාගත් මුරුක්කන් පොලිස් වසමේ පුද්ගලයින් 5 දෙනෙකු හා සිලාවතුර පොලිස් වසමේ පුද්ගලයින් 79 දෙනෙකු අත්අඩංගුවට ගනු ලැබිණි.

මන්නාරම ජ්‍යෙෂ්ඨ පොලිස් අධිකාරී කාර්යාලයට අනුයුක්ත පොලිස් නිලධාරීන් කණඩායමක් හා විදුලි බල මණ්ඩලයේ ලංකාව පුරා ඇති විශේෂ විමර්ශන ඒකකවල සියලුම නිලධාරීන් යොදවා සිදුකළ සෝදිසි මෙහෙයුමකදී විදුලි රැහැන් වලට කොකු ගසා හොරෙන් විදුලිය ලබාගත් පුද්ගලයින් 84 දෙනෙකු අත්අඩංගුවට ගෙන ඇත.

විදුලි රැහැන් වලට කොකු ගසා විදුලිය හොරෙන් ලබා ගැනීම හේතුවෙන් රටට විශාල පාඩුවක් සිදුවී ඇති බවත්  විදුලි රැහැන් වලට කොකු ගසා විදුලිය ලබා ගැනීම ඉතාම අන්තරායකාරී බවත් පෙන්වා දෙන ඉන්දික ප‍්‍රනාන්දු මහතා 2009 අංක 20 දරණ විදුලි බල පනතේ 49 හා 50 වැනි වගන්ති වලට අනුව වංචනික ආකාරයෙන් විදුලිය ලබාගැනීම අපරාධමය වරදක් බවද පැවසීය.

සංඥය වරදක් වන වංචනික ආකාරයෙන් විදුලිය ලබාගැනීමේ චෝදනාවට වරදකරුවන් වන පුද්ගලයකුට රුපියල් 10,000/- හා රුපියල් 50,000/- අතර දඩ මුදල් නියම කළ හැකි බව නීතීයේ සඳහන් වන බව පැවසු ඉන්දික ප‍්‍රනාන්දු මහතා ඊට අමතරව වංචනික ආකාරයෙන් විදුලිය ලබාගැනීම හේතූවෙන් මණ්ඩලයට සිදුවු පාඩුව ගෙවීමට සිදුවන බවද බැවසීය.

මෙවැනි විදුලි හොරුන් අල්ලා ගැනීම සඳහා ඉදිරියේදී ද ලංකාව පුරා විමර්ශන සිදුකරන බව පැවසු ඉන්දික ප‍්‍රනාන්දු මහතා වංචනික ආකාරයෙන් විදුලිය ලබාගන්නා පුද්ගලයින් පිළිබඳ තොරතුරු 1987 හා 0112422259 දුරකථන අංක වලට හෝ 0112433183 ෆැක්ස් අංකයට දැනුම් දෙන ලෙස මහජනතාවගෙන් ඉල්ලා සිටී.