( +++බණ්ඩාරගම බිමල් ශ්‍යාමන් ජයසිංහ)

හොරණ කිරිගලහේන ප්‍රදේශයේ පාළු නිවසක වධකාගාරයක් පවත්වාගෙන යමින් මත්ද්‍රව්‍ය ජාවාරමේ නිරතවන බව කියන දස දෙනෙකුගේ කල්ලියක ප්‍රධාන සැකකරු ඇතුළුව හතර දෙනකු අත්අඩංගුවට ගත් බව පොලිස් විශේෂ කාර්ය බළකාය කියයි.

මොවුන් අත්අඩංගුවට ගැනීමත් සමග ඔවුන් සතුව තිබූ මන්නා පිහි හයක් කඩු හතරක් සහ ජංගම දුරකථන පොලිසියේ බාරයට ගෙන ඇත.

පොලිස් විශේෂ කාර්ය බළකායට ලැබුණු තොරතුරක් මත මෙම වැටලීම සිදු කළ අතර පොලිස් විශේෂ කාර්ය බළකායේ ශ්‍රී ජයවර්ධනපුර කඳවුරේ පාතාල මර්දන ඒකක දෙක කණ්ඩායමේ නිලධාරීන් හොරණ කීරගල ප්‍රදේශයේ දී 22 හැවිරිදි ප්‍රධාන සැකකරු අත්අඩංගුවට ගෙන ඇත.

මීට අමතරව ඔවුන් වදකාගාරයක් පවත්වාගෙන ගිය බව කියන අඩක් වැඩ නිමකළ නිවසක සිටි තුන් දෙනකු අත්අඩංගුවට ගත් බව පොලිස් විශේෂ කාර්ය බළකාය කියයි.

මෙම කල්ලියට එරෙහි වන්නන් පැහැරගෙන ගොස් එම නිවසට ගෙනගොස් ගස් බැඳ පහරදීම් සහ පිළිස්සීම් සිදු කොට ඇති බවට තොරතුරු හෙළිවී ඇතැයි පොලිසිය කියයි.

මොවුන් පුද්ගලයන් පැහැර ගැනීම සහ වධහිංසා කිරීම රාත්‍රී කාලයේ සිදු කර ඇති බවට හෙළිවී ඇත.

එම කල්ලියේ ලාබාලතමයා අවුරුදු 16ක් වන තරුණයකු බවට හෙළිවී ඇති අතර ඔහු පදිංචිව සිටින නිවස වධකාගාරය පවත්වාගෙන ගිය බවට පොලිසිය කළ පරීක්ෂණවලින් හෙළිවී ඇත.

මෙම කල්ලියේ වධහිංසාවන්ට ලක්වූ පිරිසක් පොලිසියට පැමිණිලි කර ඇතැයි ද පොලිසිය කියයි.

මෙම කල්ලියේ ප්‍රධාන සැකකරු ඇතුළු කිහිප දෙනෙකු මත්ද්‍රව්‍ය පානය කර නන් දොඩවන අයුරු දැක්වෙන වීඩියෝ දර්ශන මෙන්ම ඔවුන්ට විරුද්ධ වූ තරුණයන් ගස් බැඳ ශාරීරික වද හිංසා පමුණුවන අයුරු දැක්වෙන වීඩියෝ දර්ශන පොලිස් බාරයට ගත් ප්‍රධාන සැකකරුගේ ජංගම දුරකථනයේ සටහන්වී තිබූ බව එම පොලිස් නිලධාරියා වැඩිදුරටත් පැවසීය.

අත්අඩංගුවට ගත් සැකකරුවන් අධිකරණයට ඉදිරිපත් කිරීම සඳහා හොරණ පොලිසිය වෙත බාරදී ඇත.

පොලිස් විශේෂ කාර්ය බළකායේ ජ්‍යෙෂ්ඨ නියෝජ්‍ය පොලිස්පති එම්.ආර්. ලතිෆ් මහතාගේ උපදෙස් මත පරීක්ෂණ පවත්වයි.