(අංජුල මහික වීරරත්න)

හෙට ලෝකය කල්තියා දැක ශ්‍රී ලංකාවේ එම නව ලෝකය බිහි කිරීමට හැකියාව ඇත්තේ එක්සත් ජාතික පක්ෂයට පමණක් බව එක්සත් ජාතික පක්ෂ නායක රනිල් වික්‍රමසිංහ මහතා පක්ෂ සාමාජික ප්‍රවර්ධන වැඩසටහන අරඹමින් අද (20) පැවසීය.

හෙට දුටු නායකයෙක් ලෙස මහාමාන්‍ය ඩී.එස් සේනානායක බිහිකළ පරපුර සිටින්නේ එක්සත් ජාතික පක්ෂයේ බව කී රනිල් වික්‍රමසිංහ මහතා නිදහසේ සිය වන සැමරුම වනවිට දියුණු ශ්‍රී ලාංකික ජාතියක් බිහි කිරීම සඳහා වෙනස් නොවන ප්‍රතිපත්ති රාමුවක සිට කටයුතු කරන බව ද පැවසීය.ඒ වෙනුවෙන් අලුත් තරුණයන් පක්ෂ නායකත්වයට පත් කරගෙන යන බවද වික්‍රමසිංහ මහතා පැවසීය.

එක්සත් ජාතික පක්ෂයේ සාමාජික ප්‍රවර්ධන වැඩසටහන ආරම්භ කිරීම සහ ඔන්ලයින් තාක්ෂණය මගින් පක්ෂයේ කටයුතු ආරම්භ කිරීම නිරෝධායන නීති වලට අනුගත වෙමින් ඊයේ පස්වරු 4ට පිටකෝට්ටේ සිරිකොත එක්සත් ජාතික පක්ෂ මූලස්ථානයේ දී පැවැත්විණි.

"හෙට එච්චර කලුවර නෑ" "හෙට දකින අපි -හෙට හදන අපි" "හෙට හදන පරපුරේ සාමාජිකයෙක් වන්න"යන තේමාවන් යටතේ මෙම සාමාජික ප්‍රවර්ධන වැඩසටහන පැවැත්විණි.

එක්සත් ජාතික පක්ෂයේ ඩිජිටල්  සාමාජික කාඩ් පත එළිදැක්වීම සහ ඩිජිටල් ඩ්‍රයිව් ඇප් මෘදුකාංගය නිකුත් කිරීමද මෙහිදී සිදු කෙරිණි.

ඔන්ලයින් තාක්ෂණයට අනුගත වන ශ්‍රී ලංකාවේ පළමු පක්ෂය ලෙස එක්සත් ජාතික පක්ෂය මෙම වැඩසටහනට අවතීර්ණ වන අතර මෙදින පක්ෂ නිර්මාතෘ ශ්‍රී ලංකාවේ ප්‍රථම අග්‍රාමාත්‍ය මහාමාන්‍ය ඩී.එස් සේනානායක මහතාගේ ජන්ම දිනය යෙදී තිබීම ද විශේෂත්වයකි.

මෙම අවස්ථාවට නියෝජ්‍ය නායක රුවන් විජයවර්ධන,සභාපති වජිර අබේවර්ධන මහලේකම් පාලිත රංගේ බණ්ඩාර , උපනායක අකිල විරාජ් කාරියවසම් මහත්වරු ප්‍රමුඛ පක්ෂ ජ්‍යෙෂ්ඨයෝ සහභාගීවූහ.

(ඡායාරූප: ඩික්සන් වසන්ත)

ඔන්ලයින් තාක්ෂණයට අනුගත වන ශ්‍රී ලංකාවේ ප්‍රථම පක්ෂය ලෙස  ඩිජිටල්  සාමාජික කාඩ් පත එළිදැක්වීම සහ ඩිජිටල් ඩ්‍රයිව් ඇප් මෘදුකාංගය නිකුත් කිරීම