(පැතුම් දර්ශන)

හොරොව්පොතාන පොලිස් ස්ථානාධිපතිවරයාට රුපියල් ලක්ෂ පහක අල්ලසක් දීමට තැත් කළ පුද්ගලයකු අල්ලස් හා දූෂණ විමර්ශන අංශයේ නිලධාරීන් විසින් අද (8) අත්අඩංගුවට ගනු ලැබීය. 

තව්හීත් ජමාත් සංවිධානයේ නායකයා ලෙස සැළකෙන සහරාන් හසීම් නැමැත්තා සමඟ සමීප සබඳතා පැවැත්වූ බවට සැකපිට අත්අඩංගුවට ගෙන අධිකරණයට ඉදිරිපත් කිරීමෙන් පසු රක්ෂිත බන්ධනාගාර ගත කර සිටින සැකකරුවකු නිදහස් කර ගැනීම සඳහා මෙලෙස අල්ලස් දීමට යාමේ දී මොහුව අත්අඩංගුවට ගෙන ඇත.

මෙලෙස අත්අඩංගුවට ගනු ලැබුවේ හොරොව්පොතාන මුක්කරවැව ප්‍රදේශයේ පදිංචි මොහොමඩ් සිපාන් නැමැති 26 හැවිරිදි තරුණයෙකි.

අල්ලස් දීමට තැත්කර ඇත්තේ තව්හීත් ජමාත් සංවිධානයේ නායකයා ලෙස සැලකෙන සහරාන් හසීම් නමැත්තා සමඟ සමීප සබඳතා පැවැත්වූ බවට සැකපිට හොරොව්පොතාන පොලිසිය විසින් හොරොව්පොතාන මුක්කරවැව ප්‍රදේශයේදීම ඉකුත් 28 වැනිදා අත්අඩංගුවට ගෙන අධිකරණයට ඉදිරිපත් කළ අබ්දුල් මජීඞ්  මොහොමඩ් නියාස් නමැති සැකකරුගේ සමීපතම ඥාතියෙකි.

2016 වසරේ සිට සහරාන් හසීම් නමැත්තා සමඟ සමීප සබඳතා පැවැත්වූ බවටත් මුදල් ගනුදෙනු සිදු කළ බවටත් සැකපිට හොරොව්පොතාන පොලීසිය විසින් එම සැකකරු අත්අඩංගුවට ගෙන ඉකුත් 28 වනදා කැබිතිගොල්ලෑව මහෙස්ත්‍රාත් අධිකරණයට ඉදිරිපත් කරන ලදි. 

එහිදී ලබන 14 වැනිදා දක්වා සැකකරු රක්ෂිත බන්ධනාගාර ගතකිරීමට කැබිතිගොල්ලෑව මහේස්ත්‍රාත්වරයා නියෝග කළේය.

එම සැකකරු නිදහස් කර ගැනීම සඳහා ස්ථානාධිපතිවරයාට පොරොන්දු ලක්ෂ පහක මුදලින් ලක්ෂ දෙකහමාරක් දීමට සැකකරුගේ ඥාතී පුත්‍රයකු උත්සාහ කළ අවස්ථාවේදී එම තැනැත්තා අත්අඩංගුවට ගෙන තිබේ. 

මෙම අල්ලස් දීමේ උත්සාහය සම්බන්ධ සියලු තොරතුරු අල්ලස් හා දූෂණ විමර්ශන අංශයේ නිලධාරීන්ට දන්වා මෙම වැටලීමට පූර්ණ සහාය දී ඇත්තේ හොරොව්පොතාන පොලිසියයි.

අල්ලස් දීමට තැත්කිරීම සම්බන්ධයෙන් අත්අඩංගුවට ගත් සැකකරු අද (8)කැබිතිගොල්ලෑව මහෙස්ත්‍රාත් අධිකරණයට ඉදිරිපත් කිරීමට නියමිතය.