(සිතුම් චතුරංග)
 
වවුනියාව නගරසභාවේ කැළි කසල රැගෙන යන ලොරි රථයක තිබී බෝම්බ පිපිරවීමට යොදාගන්නා සේවානූල්, වෙඩිබෙහෙත් සහ ජාතික හැඳුනුම්පත් කිහිපයක් අද(02) සොයාගත් බව වවුනියාව පොලිසිය කියයි.
 
එහි තිබී වෙඩිබෙහෙත් ග‍්‍රෑම් 35ක්, සේවානූල් මීටර පහක්  සහ ජාතික හැඳුනුම්පත් 3ක්සොයාගත් බව  පොලිසිය පවසයි.
 
ධාවනය නොකර නවතා තිබූ කසළ රැගෙන යන ලොරි රථයක සැකකටයුතු පාර්සලයක් තිබෙන බවට නගර සභා සේවකයකු විසින් වවුනියාව පොලිසිය වෙත ලබාදුන් තොරතුරකට අනුව වවුනියාව පොලිස් විශේෂ කාර්ය බලකාය හා පොලිසිය කළ සෝදිසියකදී මෙම පුපුරණ ද්‍රව්‍ය සොයාගෙන තිබේ.
 
 
මේ දිනවල ආරක්ෂක අංශ විශේෂ සෝදිසි මෙහෙයුම් කරන බැවින් පුපුරණ ද්‍රව්‍ය ළඟ තබාගත් පුද්ගලයින් විවිධ ස්ථානවලට ඒවා ගෙනත් දමන බවට සැක කරන බව පොලිසිය වැඩිදුරටත් කියයි.
         
සැකකරු සොයා වවුනියාව පොලිසිය වැඩිදුර විමර්ශන පවත්වයි.