(මනෝප‍්‍රිය ගුණසේකර)

පළමු වසරට සිසුවකු ඇතුළත් කරගැනීම සඳහා එම සිසුවාගේ පියාගෙන් රුපියල් ලක්‍ෂ 3 ක අල්ලසක් ඉල්ලා ලබාගත් බවට ගාල්ල සිරිධම්ම ජාතික පාසලේ හිටපු විදුහල්පතිවරයාට එරෙහිව පවරා තිබු නඩුවේ චෝදනා ඔප්පු කර නොමැති බව තීරණය කළ කොළඹ මහාධිකරණ විනිසුරු ප‍්‍රදීප් හෙට්ටිආරච්චි මහතා සියලුම චෝදනා වලින් ඔහු නිදොස් කොට නිදහස් කළේය.

සිරිධම්ම ජාතික පාසලට පළමු වසරේ සිසුන් 40 ක් සඳහා නව පන්ති කාමර සහිත ගොඩනැඟිල්ලක් ඉදිකිරීම සඳහා පාසල් සංවර්ධන සමිතිය සඳහා ලබාගත් මුදල් පාසලේ විදුහල්පතිවරයා ගත් අල්ලසක් නොවන බව තීරණය කළ විනිසුරුවරයා ගාල්ල සිරිධම්ම ජාතික පාසලේ හිටපු විදුහල්පතිවරයා නිදොස් කොට නිදහස් කිරීමට නියම කළේය.

රුපියල් ලක්‍ෂ 72 ක් වැය කර පාසලට නව ගොඩනැඟිල්ලක් ඉදිකිරීම සඳහා අඩුපාඩුව තිබු රුපියල් ලක්‍ෂ 3 ක් සොයාගැනීම සඳහා පාසල් සංවර්ධන සමිතිය වෙනුවෙන් ලබාගත් මුදල් සඳහා රිසිට්පතක් නිකුත් කිරීමට ද මත්තෙන් අත්අඩංගුවට පත්වූ බව සඳහන් ගාල්ල සිරිධම්ම ජාතික පාසලේ විදුහල්පතිවරයා ලෙස කටයුතු කළ ගාල්ලේ අම්පේගම පදිංචි නිහාල් ගුරුසිංහ මහතා මෙලෙස නිදොස් කොට නිදහස් කරන ලදී.

2014 අගොස්තු මස 10 වැනිදාත් සැප්තැම්බර් මස 15 වැනිදාත් අතර කාලය තුළ ගාල්ලේ දී ගාල්ල සිරිධම්ම ජාතික පාසලේ විදුහල්පතිවරයා වශයෙන් කටයුතු කරමින් එම විදුහලේ පළමු වසර සඳහා දරුවකු ඇතුළත් කර ගැනීම සඳහා වළවේ පල්ලියගුරුගේ සනත් ධර්මප‍්‍රිය නමැත්තාගෙන් රුපියල් ලක්‍ෂ 5 ක අල්ලසක් ඉල්ලා ඉන් රුපියල් ලක්‍ෂ 3 ක් ලබාගත් බවට විත්තිකරුට එරෙහිව අල්ලස් කොමිසම විසින් චෝදනා 4ක් යටතේ නඩු පවරා තිබිණි.

මේ සම්බන්ධයෙන් පැවැති දීර්ඝ නඩු විභාගයේදී මෙම නඩුවේ පැමිණිලිකාර සනත් ධර්මප‍්‍රිය නමැත්තාගේ පොඩිපුතා පාසල් සංවර්ධන කටයුතු සඳහා මුදලක් ලබාගෙන සහෝදර පදනම යටතේ සිරිධම්ම ජාතික පාසලට ඇතුලත් කරගැනීමට විදුහල්පතිවරයාගෙන් ඉල්ලීමෙන් පසු පැමිණිලිකරුම ඒ පිළිබඳව එවකට හිටපු අධ්‍යාපන ඇමැතිවරයා දැනුවත් කිරීමෙන් පසුව ඔහුගේ උපදෙස් මත මේ පිළිබඳ අල්ලස් කොමිසමට පැමිණිලි කර ඇතැයි හෙළිවිය.

පාසලේ ලමුන්ගේ දැඩි තදබයක් තිබූ නිසා අලුතින් පළමු වසරේ පන්තියක් වැඩි කිරීමට අධ්‍යාපන අමාත්‍යංශයෙන් අවසර දී තිබුණේ ගොඩනැඟිල්ල පාසලෙන් ඉදිකරවා ගැනීමේ පොරොන්දුව යටතේ බවත් ඒ අනුව තට්ටු 4 කින් යුත් ගොඩනැඟිල්ලක් ඉදිකිරීම සඳහා රුපියල් ලක්‍ෂ 70ක් ඇස්තමේන්තු කර තිබූ බවත් විත්තිකරු වෙනුවෙන් පෙනී සිටි නීතීඥ ප‍්‍රදීප් ජයකොඩි මහතාගේ හරස් ප‍්‍රශ්න හමුවේ හෙළි වූ අතර පාර්ලිමේන්තු මන්ත‍්‍රී රමේෂ් පතිරණ මහතාගේ විමධ්‍යගත අරමුදල්ද ඇතුලූව රුපියල් ලක්‍ෂ 68 ක් පාසල් සංවර්ධන සමිතිය නමින් ලංකා බැංකුවේ පවත්වාගෙන ගිය ගිණුමේ තැන්පත් කර තිබූ ආකාරයත් නඩු විභාගයේදී අනාවරණය විය.

ලබාගත් රුපියල් ලක්‍ෂ 3 ක මුදල සඳහා රිසිට්පතක් නිකුත් කිරීමටත් මත්තෙන් අල්ලස් කොමිසමේ නිලධාරීන් විත්තිකරු අත්අඩංගුවට ගෙන ඇති බවත් විත්තිකාර ගාල්ල සිරිධම්ම ජාතික පාසලේ හිටපු විදුහල්පතිවරයා විසින් නීතීඥ ප‍්‍රදීප් ජයකොඩි මහතාගේ මෙහෙයවීම යටතේ දුන් සාක්කිය පිළිගැනීමටත් තීන්දු කළ විනිසුරුවරයා විත්තිකරුට එරෙහි චෝදනා පැමිණිල්ල විසින් සාධාරණ සැකයකින් තොරව ඔප්පු කර නොමැති බවට තීරණය කරමින් සියලුම  චෝදනා  වලින් ඔහු නිදොස් කොට නිදහස් කළේය.

විත්තිකරු වෙනුවෙන් නීතීඥ ප‍්‍රදීප් ජයකොඩි මහතා පෙනී සිටියේය.