(එෆ්.අස්ලම්)

කොටි සංවිධානයේ ආයුධ  සන්නද්ධ අරගලය අවතක්සේරු කරමින් එම්.ඒ සුමන්තිරන් මන්ත්‍රීවරයා විසින් කරන ලද ප්‍රකාශයට ආර්.සම්බන්ධන් ප්‍රමුඛ දෙමළ ජාතික සන්ධානයම වගකිව යුතු යැයි දෙමළ එක්සත් විමුක්ති පෙරමුනේ නායක වී.ආනන්ද සංගරි මහතා පවසයි.  2010 ජාතික ලැයිස්තු මන්ත්‍රීධූරයක් ගෙන පාර්ලිමේන්තුවට පිවිසීමෙන් පසු ඉංග්‍රීසි මාධ්‍යක් සමගින්ද කොටි සංවිධානයේ ආයුධ සන්නද්ධ අරගලය අවතක්සේරු කරමින් සුමන්තිරන් මහතා ප්‍රකාශයක් සිදුකළ බවත් දෙමළ ජාතික සන්ධානයද ඊට මුනිවත රකිමින් අනුග්‍රහාය සැපයූ බවත් සංගරි මහතා සදහන් කර සිටීයි.

සමාජ ජාලා සමගින් සංවාදයකට එක්ව කොටි සංවිධානයේ ආයුධ සන්නද්ධ අරගලය පිළිනොගන්නා බවට සුමන්තිරන් මන්ත්‍රීවරයා විසින් කරන ලද ප්‍රකාශයක් සම්බන්ධයෙන් මාධ්‍ය නිවේදනයක් නිකුත් කරමින් ආනන්ද සංගරි මහතා මේ බව සදහන් කරයි.

එහි වැඩිදුරටත් මෙසේද සදහන්වේ.

2010 වසරේ ජාතික ලැයිස්තු මන්ත්‍රීධූරයක් ගනිමින් පාර්ලිමේන්තුවට පිවිසි
එම්.ඒ සුමන්තිරන් මහතා ඒ වසරේදී ඉංග්‍රීසි මාධ්‍යක් සමගින් සංවාදයකට එක්ව  ආයුධ සන්නද්ධ අරගලයක් ආරම්භ කළේ උතුරේ රැකියා විරහිත තරුණයින් බවටත් ආරක්ෂක හමුදාවට වඩා සාමාන්‍ය ජනතාව ඝාතනය කළේ කොටි සංවිධානය බවටත් ප්‍රකාශයක් සිදුකර තිබුණා. එවක රජයට එරෙහිව කොපමණ විමර්ශන පැරමිණියත් ඊට මුහුණ දීමේ සාක්ෂියක් ලෙසින් තමන් කටයුතු කරන බවට සුමන්තිරන්ගේ ප්‍රකාශයෙන්  නොකියා කියා තිබුණා.

බන්ධනාගාර ගතකර සිටින දෙමළ දේශපාලන සිරකරුවන් නිදහස් කරගැනීමේ   කාරණයෙදී සුමන්තිරන්ගේ දායකත්වය ආණ්ඩු හිතවාදීව සහ දෙමළ දේශපාලන සිරකරුවන්ට ප්‍රතිවාදීවයි සිදුවුනේ කියල එදා දෙමළ ජාතික සන්ධානයට නොතේරුනේද ? මේ කාරණය සම්බන්ධයෙන් මා හැර අන් කිසිවෙකු හෝ  කතා කලේ නැහැ.
එවන් පුද්ගලයෙකු වූ සුමන්තිරන් පසුගිය 2015 මැතිවරණය සදහා යාපනය දිස්ත්‍රීක්කය සදහා ඉදිරිපත් කර ඔහුව ජයග්‍රහණය කරවීමට දෙමළ ජාතික සන්ධානයේ නායක ආර්.සම්බන්ධන් කටයුතු කළා. එදා සුමන්තිරන් සිදුකළ ඒ ප්‍රකාශය ගණනකට නොගෙනයි දෙමළ ජාතික සන්ධානය ඔහුව ජයග්‍රහණය කරවනු ලැබුවේ. ඒ ප්‍රකාශයම තමයි වෙනත් ආකාරයකින් සුමන්තිරන් පසුගියදා සිංහල සමාජ මාධ්‍යක් සමගින් සිදුකරනු ලැබුවේ. මෙනිසා දෙමළ ජාතික සන්ධානයේ කිසිවෙකුට සුමන්තිරන් ගැන විවේචනය කිරීමට සුදුසුකමක් නැහැ.

2015 මහ මැතිවරණයේදී සුමන්තිරන්ට මනාප 58,000ක් ලැබුනා. ආයුද සන්නද්ධ අරගලයක් ආරම්භ කළේ උතුරේ රැකියා විරහිත තරුණයින් බවටත් ආරක්ෂක හමුදාවට වඩා සාමාන්‍ය ජනතාව ඝාතනය කළේ කොටි සංවිධානය යැයි කියන ස්ථාවරය පදනම් කරගෙන නැවතත් ඒ බව අවධාරණය කරන්නට ඔහු කටයුතු කළා.

එතුළ ඔහුගේ කිසිදු වරදක් නැහැ.ඔහු කී දේ නිවැරදියි කියල පිළිගන්න නිසයි 2015 වසරේදී සුමන්තිරන්ට අපේක්ෂකත්වය ලබාදීමට දෙමළ ජාතික සන්ධානය කටයුතු කලේ. මෙය කැමැත්තෙන් හෝ අකමැත්තෙන් දෙමළ ජාතික සන්ධානය පිළිගත යුතු සත්‍යක්.

කාලයෙන් කාලයට දෙමළ ජනතාව රැවටීම වෙනුවෙන් දෙමළ ජාතික සන්ධානය රගදක්වන තවත් නාට්‍යක් තමයි මේ.මැතිවරණ කාලය නිසා තව තවත් මේ වගේ නාට්‍ය බලාගන්න පුළුවන් යැයිද ආනන්ද සංගරි මහතා සිය නිවේදනයෙන් තවදුරටත් අවධාරණය කර සිටීයි.