ඉන්දියාවේ ප්‍රවීණ සංගීතඥයකු වූ පණ්ඩිත් ජස්රාජ් මහතා ඇමෙරිකාවේදී අභාවප්‍රාප්ත වී ඇත. මියයන විට ඔහු 90 හැවිරිදි වියේ පසුවිය.

බොලිවුඩ් චිත්‍රපටවලට ද ඔහු සිය සංගීතය නිර්මාණවලින් දායක විය.

ඔහු වඩාත් ප්‍රසිද්ධියට පත්වූයේ ඉන්දියානු සම්භාව්‍ය සංගීතය ලොව පුරා ජනප්‍රියත්වයට පත්කිරීමට පුරෝගාමී දායකත්වයක් සැපයූ සංගීතඥයෙකු ලෙසය.

කොරෝනා වයිසරයේ පැතිරීම පාලනය කිරීම සඳහා ඉන්දියාව පසුගිය මාර්තු මාසයේ අගුලුදැමීමේ සීමා පනවන විට ඔහු රැඳී සිටියේ එක්සත් ජනපදයේය.එබැවින් සංචාරක සීමා යථා තත්ත්වයට පත්වන තෙක් ඔහු අමෙරිකාවේ නැවතී සිටීමට තීරණය කළ බව ඔහුගේ පවුලේ සාමාජිකයෝ පැවසූහ. 

ඔහුගේ මරණයෙන් සමස්ත ඉන්දියාවම කම්පාවට පත්ව සිටින අතර අගමැති නරේන්ද්‍ර මෝදි මහතා ද ට්විටර් පණිවිඩයක් නිකුත් කරමින් ඒ පිළිබඳ දැඩි ශෝකය පළකර ඇත. ජස්රාජ් මහතා සමඟ කටයුතු කළ ඉන්දීය ප්‍රවීණ ගායිකා ලතා මංගේෂ්කාර් මහත්මිය පැවසුවේ මෙම මරණය පිළිබඳ පුවතින් තමා දැඩි කනගාටුවට පත්වූ බවයි.

ඉන්දීය සංගීත ක්ෂේත්‍රයේ විශාල පිරිසක් මෙම මරණය සම්බන්ධයෙන් සිය ශෝකය පළකර තිබේ.

(බීබීසී ඇසුරෙනි -226)