(බිමල් ශ්‍යාමන් ජයසිංහ)

විශ්ව බලයෙන් රෝග සුව කරන මහා බලයක් ඇතැයි පවසමින් පුරා පැය හයකට ආසන්න කාලයක් නිවසේ විදුලිය විසන්ධි කර කෝටිපති ව්‍යාපාරික නිවැසියන් මුලාකර රුපියල් ලක්ෂ දහයකට ආසන්න රන් භාණ්ඩ ඇතුළු දේපල වංචා කළ යකැදුරකු බව කියන පුද්ගලයකු පන්නිපිටිය ඇරැව්වල දි අත්අඩංගුවට ගත් බව තලංගම පොලිසිය කියයි.

තලවතුගොඩ හෝකන්දර ප්‍රදේශයේ පුද්ගලයකු මිතුරකු මාර්ගයෙන් මෙම වංචාකාරී පුද්ගලයා හඳුනාගෙන ඇති අතර රෝගීව සිටින ව්‍යාපාරික පියාව සුවපත් කිරීමේ අරමුණින් පන්නිපිටිය ඇරැව්වල ප්‍රදේශයේ පවත්වාගෙන යන දේවාලය කරා මිතුරා හා මව සමග මීට මාස කීපයකට පෙර ගොස් තිබූ බව පොලිසිය කියයි.

එහිදී ශාන්තිකර්මය කිරීම සඳහා රුපියල් එක් ලක්ෂ විසිදහසක මුදලක් ඉල්ලා ඇති අතර ව්‍යාපාරික නිවැසියන් ඒ මොහොතේම රුපියල් 58,000 ක අත්තිකාරම් මුදලක් ලබාදී තිබු බව පොලිසිය කියයි.

ඉකුත් මැයි මස 22 දින ශාන්තිකර්මය කිරීම සඳහා සැකකාර යකැදුරා කාලි මෑණියන් ආරූඩ වන බව කියන ඔහුගේ නැගණිය ,ඇතුළු මව හා පියා ද සමග හෝකන්දර නිවසට ගොස් මෙම වංචාව සිදු කර ඇතැයි පොලිසිය කියයි.