( +++ සුජිත් හේවා ජුලිගේ)

මහ බැංකු බැඳුම්කර සිද්ධිය සම්බන්ධයෙන් ශ්‍රී ලංකා මහ බැංකුව විසින් නිකුත් කෙරුණු වෝහාරික විගණන වාර්තාව (Foencic Audit Report) මන්ත්‍රීවරුන්ට නිකුත් කරනවාද? නැද්ද? යන්න සම්බන්ධයෙන් කතානායක කරු ජයසූරිය මහතා පාර්ලිමේන්තුවේ දී අද (21) පස්වරුවේ ප්‍රකාශයක් කිරීමට නියමිතය.

මහ බැංකු බැඳුම්කර සිද්ධියට අදාළව නඩු කටයුත්තක් ක්‍රියාත්මක වන හෙයින් වෝහාරික විගණන වාර්තාව මන්ත්‍රීවරුන්ට බෙදා දීමෙන් ඒ නඩු කටයුතුවලට බාධා මතුවිය හැකි බවට නීතිපතිවරයාගේ මතය වී තිබෙන අතර නීතිපතිවරයාගේ මතය කතානායකවරයා විසින් ඉකුත්දා මැතිසබයට දැනුම් දෙනු ලැබීය.

වෝහාරික විගණන වාර්තාව තමන්ට දැකබලා ගැනීමේ අයිතියක් ඇති බවත් වාර්තා නොදීමෙන් තමන්ගේ පාර්ලිමේන්තු වරප්‍රසාද උල්ලංඝනය වන බවත් මන්ත්‍රීවරු රැසක් කතානායකවරයාට දිගින් දිගටම පැමිණිලි කළහ.

කතානායකවරයා මේ කාරණය සම්බන්ධයෙන් නීතිපති දෙපාර්තමේන්තු නිලධාරීන් සමඟ ඉන්පසු සාකච්ඡා වට කිහිපයක්ම පැවැත්වීය.

මහ බැංකු බැඳුම්කර සිද්ධිය පිළිබඳ වෝහාරික විගණන වාර්තාව ශ්‍රී ලංකා මහ බැංකුව විසින් කතානායකවරයාට ඉකුත්දා භාරදෙනු ලැබූ අතර ඒ වාර්තාව දැනට පවතින්නේ පාර්ලිමේන්තු පොදු ව්‍යාපාර පිළිබඳ කාරක සභාව (කෝප්) බාරයේය.

කතානායකවරයා මේ ප්‍රශ්නය සම්බන්ධයෙන් කෝප් කමිටුවේ හිටපු සභාපති ජවිපෙ මන්ත්‍රී සුනිල් හඳුන්නෙත්ති මහතා සමඟ ද සාකච්ඡාවක් පැවැත් වීය.