(ඩී.ජී.සුගතපාල)

ගාල්ල උණවටුන ඓතිහාසික වැල්ලෙ දේවාලයේ වාර්ෂික ඇසළ උත්සවය මෙවර නොපැවැත්විමට තීරණය කළ   බව ගාල්ල දිස්ත්‍රික්  ලේකම් සෝමරත්න විදානපතිරණ මහතා පැවසීය .

ගාල්ල දිස්ත්‍රික්  ලේකම් සෝමරත්න විදානපතිරණ මහතාගේ  ප්‍රධානත්වයෙන් වැල්ලෙ දේවාල විහාරාධිපති ශාස්ත්‍රපති  තල්පෙ අරියජෝති හිමි ඇතුළු  රාජ්‍ය නිලධාරින්ගේ හා  වැල්ලෙ දේවාල  දායක සභාවේ   සහභාගීත්වයෙන් පැවැති විශේෂ  සාකච්ඡාවකදී මෙම තීරණය  ගත් බවද දිස්ත්‍රික් ලේකම්වරයා පැවසිය .

කොරෝනා වසංගත තත්ත්වය  හේතුවෙන් පනවා ඇති සෞඛ්‍ය මාර්ගෝපදේශ අනුව චාරිත්‍රානුකූල වත් පිළිවෙත් පමණක් සිදු කිරීම සුදුසු බවට  සෞඛ්‍ය  අංශ ලබා දුන්  උපදෙස් මත මෙම තීරණයට එළඹ තිබේ.

විශාල බැතිමතුන් පිරිසක් සහභාගී වන මෙම ඇසළ උත්සවය මෙවර ජන සහභාගීත්වයෙන් තොරව චාරිත්‍රානුකූලව සිරිත් පරිදි පුද පුජා විධි පමණක් පැවැත්වෙන බවත් බාහිර පුද්ගලයින්ට  මෙයට සම්බන්ධ  විමට ඉඩක් නැති බවත්   ඒ සදහා සුවිශේෂ ආරක්ෂක විධිවිධාන යොදන බවත්  දිස්ත්‍රික් ලේකම් සෝමරත්න විදාන පතිරණ මහතා  වැඩිදුරටත් පැවසීය.