( තිළිණි ද සිල්වා)

සිංගප්පූරුවේ ලාභ නොලබන සංවිධානයක් වන ප්ලාස්ටික් අපද්‍රව්‍ය අවසන් කිරීම සඳහා වූ ගෝලීය සන්ධානය (අ’ලයන්ස්),ඇමරිකා ඩොලර් 1, 80,000 පමණ වටිනා 'බීච්ටෙක් හයිඩ්‍රෝ ස්වීප්''වෙරළ පිරිසිදු කිරීමේ යන්ත්‍රෝපකරණ 8ක් ශ්‍රී ලංකා සමුද්‍රීය පරිසර ආරක්‍ෂක අධිකාරිය වෙත ලබා දුන් බව විදේශ අමාත්‍යාංශය පවසයි.

මෙම උපකරණ තොගය විදේශ ලේකම් අද්මිරාල් මහාචාර්ය ජයනාත් කොළඹගේ මහතා විසින් වෙරළ සංරක්‍ෂණ සහ පහත් බිම් සංවර්ධන රාජ්‍ය අමාත්‍ය ගරු මොහාන් ප්‍රියදර්ශන ද සිල්වා මැතිතුමා සහ සමුද්‍රීය පරිසර ආරක්ෂණ අධිකාරියේ සභාපතිනි දර්ශනී ලහඳපුර මහත්මිය වෙත නිල වශයෙන් භාර දෙන ලදී.

ජර්මනියේ කැස්බොහරර් ගෙලන්ඩෙෆාර්සියුග් ඒජී සමාගම විසින් නිෂ්පාදනය කරන ලද මෙම වෙරළ පිරිසිදු කිරීමේ යන්ත්‍ර මඟින් කුඩා ප්ලාස්ටික් කැබලි හා අනෙකුත් අපද්‍රව්‍ය ඵලදායීව හා කාර්යක්ෂමව පිරිසිදු කිරීමේ හැකියාව ඇත.

මෙම යන්ත්‍රයේ ඇති තවත් වාසියක් නම් අනතුරුදායක ද්‍රව්‍ය සමඟ මිනිස් සම්බන්ධතා අවම කරමින් වෙරළ පිරිසිදු කිරීම ආරක්ෂිතව සිදු කළ හැකි වීමයි.

ඉකුත් මැයි මාසයේ දී සැලකිය යුතු පාරිසරික හානියක් සිදු කරමින් ශ්‍රී ලංකාවේ බටහිර වෙරළ තීරයේ මුහුදුබත් වූ එක්ස්ප්‍රස් පර්ල් නැවෙන් නිකුත් වූ ප්ලාස්ටික් අපද්‍රව්‍ය පිරිසිදු කිරීම සඳහා මෙම යන්ත්‍ර උපකාරී වනු ඇතැයි අපේක්‍ෂා කෙරේ.

මෙම පරිත්‍යාගය සම්බන්ධීකරණය කරන ලද්දේ සිංගප්පූරුවේ ශ්‍රී ලංකා මහ කොමසාරිස් කාර්යාලය විසිනි.