(නිමල කොඩිතුවක්කු)       
    
ෆෙඩරල් බලයට යටවූ අගමැතිවරයෙක්  පත් කරගන්නා ගමන්ම විපක්ෂ නායක තනතුරත්  ෆෙඩරල් වාදය යටතේම තියාගැනීම දෙමළ ජාතික සන්ධානයේ අරමුණ වී ඇතැයි  යුතුකම ජාතික සංවිධානයේ  සභාපති ගෙවිදු කුමාරතුංග මහතා කොළඹදි අද (2) පැවැසීය.


පාර්ලිමේන්තුව සම්පූර්ණයෙන්ම ෆෙඩරල්වාදී, බෙදුම්වාදී ඉල්ලිමේ  රූකඩයක් බවට පත්කර තම අවශ්‍යතා ඉටු කරගැනීම දෙමළ ජාතික සන්ධානය ඇතුළු පිරිස්වල අරමුණ බවත් කුමාරතුංග මහතා සඳහන් කළේය.


යුතුකම ජාතික සංවිධානය තුම්මුල්ල සම්බුද්ධ ජයන්ති මන්දිරයේ කැඳවූ මාධ්‍ය හමුවකට එක්වෙමින් ඔහු මේ බව පැවැසීය.
එහිදි වැඩිදුරටත් අදහස් දැක්වූ ගෙවිදු කුමාරතුංග මහතා මෙසේද කීය.


 ‘‘එක්සත් ජාතික පෙරමුණේ අයෙකුට අගමැතිධුරය ලබා දෙන ලෙසට දෙමළ ජාතික සන්ධානයේ මන්ත‍්‍රිවරුන් 14ක අත්සන් සහිතව  ජනාධිපතිවරයා වෙත ලිපියක් යොමු කර  තිබෙනවා. එක්සත් ජාතික පෙරමුණ පුන පුනා කියනවා ඒ අයට බහුතරය තියෙනවා කියලා. බහුතරය  තියෙනවා නම් ඇයි මේ දෙමළ ජාතික සන්ධානයේ මන්ත‍්‍රීවරුන් ජනාධිපතිවරයාට ලිපියක් බාර දුන්නේ කියලා අපි අහනවා.


මේ ව්‍යාකූල 19 වැනි ආණ්ඩුක‍්‍රම සංශෝධනය නිසා අවුරුදු හතරහමාරක් යනකම් ජනාධිපතිවරයාට පාර්ලිමේන්තුව  විසුරුවා හරින්න බැහැ කියලා ශ්‍රේෂ්ඨාධිකරණය  යම් හෙයකින් තීරණය කලොත් සිද්ධ වෙන එකම  කාරණය තමයි ආණ්ඩුවක් නැති තත්වයකට මේ රට පත්වීමයි. මේකට මේ රටේ ජනතාව  ඉඩදිය යුතුද යන්න කියන එක  තමයි අද අප හමුවේ තියෙන ප‍්‍රශ්නය.


දෙමළ ජාතික සන්ධානය් මේ ගැටලූව  විසදන්න හදන්නේ  තමන් එක්සත්  ජාතික පක්ෂයේ අයකුට අගමැතිධුරය දෙනවට එකඟයි කියලා.  ඔක්තෝබර් 26 වැනි දා පෙර තත්වයකට  යන්න කියලා ඔවුන් එම ලිපියෙන් යෝජනා කරනවා.


ඔක්තෝබර් 26 වැනි දාට පෙර තිබුණේ සම්මුතිවාදී ආණ්ඩුවක්. ඒ ආණ්ඩුවේ පාර්ශවකරුවකු වන එක්සත් ජනතා සන්ධානය එම ආණ්ඩුවෙන්  ඉවත් වුණා. ඒ නිසා කාටවත් බැහැ රට ඔක්තොබර් 26 ට පෙර පැවති තත්වයට යන්න.


ෆෙඩරල් වෙනුවෙන් පෙනී සිටින පක්ෂයක් එක්ක එකතු වෙලා ආණ්ඩුවක් හදන්න එක්සත් ජාතික පක්ෂය සහ ජාතික හෙළ උරුමය එකඟද කියළා අපි දන්නේ නැහැ.