(රොමේෂ් මධුෂංඛ)

වව්නියාව ආච්චිපුරම් ප්‍රදේශයේ අද (4) දහවල් විදුලිය විසන්ධි කිරීමට ගිය විදුලිබල මණ්ඩලයේ සේවකයින් දෙදෙනකුට ගම්වාසීන් පිරිසක් විසින් පහර දී ඇති අතර තත්වය සොයා බැලීමට ගිය විදුලි අධිකාරීවරයාට ද පහරදීමෙන් තුවාල ලබා රෝහල ගත වී ඇත.

ආච්චිපුරම් ගම්මානයේ අනවසරයෙන් විදුලිය භාවිතා කරන පුද්ගලයින් හා විදුලිබිල් නොගෙවූ පුද්ගලයින්ගේ විදුලිය විසන්ධි කිරීමට අද දහවල් එම ගම්මානයට ගිය විදුලිබල මණ්ඩලයේ සේවකයින් දෙදෙනාට ගම්මානයේ සිටි පිරිසක් මෙලෙස පහර දී තිබේ.

පසුව ගම්මානයට ඇතුළුවීමට විදුලිබල මණ්ඩල සේවකයින්ට අවස්ථාවක් නොදී ඇති අතර තත්වය සොයා බැලීමට හා ගම්වාසීන් සමඟ සාකච්ඡා කිරීමට ගිය වව්නියාව විදුලි අධිකාරීවරයාට ද පුද්ගලයකු විසින් පහරදී ඇත.

පහරදීම සම්බන්ධයෙන් වව්නියාව පොලීසිය දැනුම් දුන්න ද වව්නියාව පොලීසිය සැළකිල්ලක් නොදැක්වූ බවට විදුලිබල මණ්ඩලයේ සේවකයින් විසින් වව්නියාව පොලීසියට චෝදනා කර සිටිති.

පහරදීමෙන් විදුලිබල මණ්ඩලයේ සෙවකයින් වව්නියාව රෝහලට ඇතුළත් වී ඇති අතර ගම්වාසීන්ගේ පහරදීමෙන් විදුලි අධිකාරීවරයාගේ හිස ප්‍රදේශය ද තුවාල වී තිබේ.

පහර දුන් පුද්ගලයින් අත්අඩංගුවට ගෙන නීතිය ක්‍රියාත්මක කළ යුතු බවටත් එසේ නොවන්නේ නම් තමන් සිය රාජකාරී කටයුතු වලින් ඉවත්වන බවටද වව්නියාවේ විදුලිබල මණ්ඩල සේවකයෝ පවසති.