(යොහාන් භාසුර)

‘කොවිඩ්’ වසංගතය මධ්‍යයේ ජනතාවට බරක් නොදීම සඳහා කටයුතු කිරීමෙන් ලිට්‍රෝ ගෑස් සමාගම උපයාගෙන තිබූ මූල්‍ය සංචිතයෙන් රුපියල් බිලියන 10ක් හෙවත් කෝටි 1000ක් මෙම වසර තුළ පමණක් වැය කර ඇතැයි ලිට්‍රෝ ගෑස් සමාගමේ සභාපති නීතිඥා තෙෂාර ජයසිංහ මහතා පැවසීය.

රටේ හැදෙන වැවෙන දේවල් අඩු මිලට දෙන්න බෑ කියන වර්තමානයේ රාජ්‍ය ආයතනයක් ලෙස ලිට්‍රෝ සමාගම වෙනත් රටකින් ගේන දේයක් මේ ආකාරයට පාඩු ලබා ජනතාවට ලබාදීම ගැන ආයනයක් හැටියට සතුටු විය හැකි යැයි පැවසූ සභාපතිවරයා ලාභ ලැබූ රාජ්‍ය ආයතනයක් ලෙස ලිට්‍රෝ සමාගම වසර 10 ක පමණ කාලයක් ඉතිරි කරගෙන තිබූ මුදල් මේ වැය කළ බවත් සඳහන් කළේය.

ලිට්‍රෝ සමාගම වර්තමාන මිලට ගෑස් සැපයීමෙන් දිනකට මිලියන 80ක් හෙවත් ලක්‍ෂ 800ක් පමණ පාඩු ලබන බවත් මේ ආකාරයට තව දුරටත් පැවතිය හොත් ලිට්‍රෝ සමාගමට ද ණය ඉල්ලීමට සිදුවිය හැකි බවත් තෙෂාර ජයසිංහ මහතා කීය.

ආයතනය අඛණ්ඩව පත්වාගෙන යෑම සඳහා ගෑස් මිල වැඩි කරන ලෙස කාලයක සිට ඉල්ලීම් කළ ද මේ දක්වා හොඳ ප්‍රතිචාරයක් ලැබී නොමැති බව සඳහන් කළ සභාපතිවරයා පැවසුවේ ලෝක වෙළෙඳපොලේ ගෑස් මෙටි්‍රක්ටොන් එකක් ඩොලර් 368 ක් තිබියදී 2019 වසරේ අගෝස්තු මස පාරිභෝගික කටයුතු අධිකාරිය වර්තමාන මිල නියම කර ඇති බවත්ය.

අද වන විට ලෝක වෙළෙඳපොලේ ගෑස් මෙටි්‍රක්ටොන් එකක් ඩොලර් 665 ක් දක්වා ඉහළ ගොස් ලබන මාස වන විට එය ඩොලර් 740 ක් වැඩි වනු ඇති බවට විශ්වාස කරන බව ද ලිට්‍රෝ ගෑස් සමාගමේ සභාපති නීතිඥා තෙෂාර ජයසිංහ මහතා වැඩි දුරටත් පැවසීය.