(ඩයනා උදයංගනී)

රජයේ රෝහල්වලට විදුලි උත්පාදනය සඳහා සූර්ය පැනල ලබාදීමට රජය තීරණය කර ඇති අතර එහි පළමු අදියර ලෙස තෝරාගත් රෝහල් 15 කට සූර්ය පැනල ලබාදීමට නියමිතය.

ඒ සම්බන්ධයෙන් සාකච්ඡාවක් සෞඛ්‍ය අමාත්‍ය පවිත්‍රා වන්නිආරච්චි මහත්මිය හා සූර්යබල, සුළං හා ජලවිදුලි ජනන ව්‍යාපෘති සංවර්ධන රාජ්‍ය අමාත්‍ය දුමින්ද දිසානායක මහතා අතර සෞඛ්‍ය අමාත්‍යාංශයේ දී පැවැත්විණි.

ජනාධිපති ගෝඨාභය රාජපක්ෂ මහතාගේ “සෞභාගයේ දැක්ම” ප්‍රතිපත්ති මාලාවට අනුව 2030 වන විට පුනර්ජනනීය බල ශක්ති භාවිතය සියයට 70ක් දක්වා වර්ධනය කිරීමට අපේක්ෂිත අතර ඒ වෙනුවෙන් ව්‍යාපෘති විශාල සංඛ්‍යාවක් දැනටමත් ආරම්භ කර ඇතැයි මෙහිදී සඳහන් විය.

සෞඛය අමාත්‍ය පවිත්‍රා වන්නිආරච්චි මහත්මිය මෙහිදී අදහස් දක්වමින් පැවසුවේ රෝහල්වලට පුනර්ජනනීය බලශක්තිය හඳුන්වාදීමේ සංකල්පය ඉතා වැදගත් බවයි.

රාජ්‍ය ආයතනයන්හි වහලවල්වල සූර්ය පැනල සවි කිරීම මඟින් පුනර්ජනනීය බල ශක්තිය උත්පාදනය කරන අතරම රටට වාසිදායක ලෙස කටයුතු කිරීමට ද හැකිවන බව ද ඇය පැවසුවාය.

ගරු රාජ්‍ය අමාත්‍ය දුමින්ද දිසානායක මහතා මෙහිදී සඳහන් කළේ රජයේ රෝහල්වල වහල මත සූර්ය පැනල සවි කිරීමෙන් අනතුරුව එහි අතිරික්ත බලශක්තිය මිල දී ගැනීමට විදුලිබල අමාත්‍යාංශය කටයුතු කරන බවත්, එයින් රෝහලට සිය මාසික විදුලි බිල අඩු කර ගන්නා අතර යම් ආදායමක් ලබා ගැනීමටත් හැකිවන බවය.