තරිඳු ජයවර්ධන

ජනාධිපති මෛත්‍රීපාල සිරිසේන මහතා සහ අගමැති මහින්ද රාජපක්ෂ මහතා හමුවී සාකච්ඡා කළද එක්සත් ජාතික පක්ෂය හැර දමා නොයන බව කඳුරට ජනතා පෙරමුණේ නායක වී රාධා ක්‍රිෂ්ණන් මහතා අද (29) පැවසීය.
 
ජනාධිපතිවරයාගෙන් සහ අගමැතිවරයාගෙන් ලැබුණු ආරාධනාවක් අනුව ඔවුන් හමුවීමට ගිය බවත් ,  ඔවුන් හා කතා කළ ද ඔවුන්ගේ පැත්තට නොයන බවත් රාධා ක්‍රිෂ්ණන් මහතා කීවේය.
 
ඒ මහතා සහ ආනන්ද කුමාර් මහතා අද (29) රාත්‍රී එක්සත් ජාතික පක්ෂ නායක රනිල් වික්‍රමසිංහ මහතා හමුවි සාකච්ඡා කළ අතර  වික්‍රමසිංහ මහතාට සහයෝගය පළ කිරීම සඳහා   අත්සන් තැබූ බව දෙමළ ප්‍රගතිශීලී සංවිධානයේ නායක මනෝ ගනේෂන් මහතා ප්‍රකාශ කළේය. වික්‍රමසිංහ මහතා හමුවීමෙන් පසු රාධා ක්‍රිෂ්ණන් මහතා තවත් මැති ඇමැතිවරුන් පිරිසක් සමඟ අරලියගහ මන්දිරයේ දී මාධ්‍ය සාකච්ඡාවකට ද සහභාගී විය. මාධ්‍ය සාකච්ඡාවේ දී අදහස් දක්වමින් ඒ මහතා මෙසේ ද කීවේය.
 
‘‘ අපි දෙමළ ප්‍රගතිශීලී සංවිධානය හැටියට හය දෙනෙක් පාර්ලිමේන්තුව නියෝජනය කරනවා. දේශපාලන පක්ෂ තුනක් එම සංවිධානය නියෝජනය කරනවා. එහි නායකයා තමයි මනෝ ගනේෂන් මහත්මයා. පහුගිය කාලයේ රාවයක් ගියා අපි ශ්‍රී ලංකා නිදහස් පක්ෂය සමඟ සමඟ එක්වෙලා අද  ඇමැතිධුරවල දිවුරුම් දෙන්න යනවා කියලා.
 
ජනාධිපතිතුමා සහ මහින්ද රාජපක්ෂ මහතා අපිට ආරාධනා කළා. අපි ගිහින් කතා කළා. කතා කළා කියලා අපි ඒ පැත්තට ගියා කියන්න බෑ. අපි තරඟ කළේ එක්සත් ජාතික පක්ෂයෙන්. අපි දිගටම එක්සත් ජාතික පක්ෂයේ ඉන්නවා. අගමැතිවරයා වන්නේ මහින්ද රාජපක්ෂ ද රනිල් වික්‍රමසිංහ ද කියලා පාර්ලිමේන්තුවේදි බහුතරයත් එක්ක බලාගන්න පුලුවන්.‘‘ යැයි ද රාධා ක්‍රිෂ්ණන් මහතා කීවේය.