(මුදිතා දයානන්ද)

 

විදේශීය බලවේගවලින් රට රැකගැනීම සදහා දේශපාලනඥයින් කෙරෙහි විශ්වාසය තැබීමට නොහැකි නිසා දේශපාලනඥයෙක් නොවන රටට ආදරය කරන පුද්ගලයෙක් අප සොයා ගත යුතුයැයි ත්‍රිකුණාමලයේ ආනන්ද අමරපුර ශ්‍රී ධම්මරක්ෂික මහා නිකායේ මහානාහිමියෝ අද (23) පැවැසූහ.

උන්වහන්සේ මේ බව පැවසූයේ ජාතික ඒකාබද්ධ කමිටුව ශ්‍රී ලංකා පදනම් ආයතනයේදී පවත්වනු ලැබූ උත්සවයකට සහභාගී වෙමිනි. ශ්‍රී ලංකා ඔරුමිත්තනාඩුව ග‍්‍රන්ථය එළිදැක්වීම වෙනුවෙන් හිටපු ජනාධිපති මහින්ද රාජපක්ෂ හා හිටපු ආරක්ෂක ලේකම් ගෝඨාභය රාජපක්ෂ මහත්වරුන්ගේද සහභාගිත්වයෙන් මෙම උත්සවය පැවැත්විණි.

මෙහිදී තවදුරටත් අදහස් දැක්වූ ආනන්ද හිමියෝ මෙසේද පැවසූහ.

     ‘‘දේශපාලනඥයින් හැමවිටම හැම දෙයක් ගැනම බලන්නේ දේශපාලන ඇසකින්. ඔවුන්ට අවශ්‍ය වන්නේ බලයට එන්න හා බලයේ රැඳෙන්නයි. ඒ නිසා ඔවුන් ගැන අපට මෙවැනි කාරණාවලදී විශ්වාසය තබන්න බැහැ.

ව්‍යවස්ථාවක් රටකට අවශ්‍ය වන්නේ ඒ රටේ ස්වාධීනත්වය ආරක්ෂා කරගනිමින් ආර්ථිකය ගොඩනැගීමට, ජනතාව සුරක්ෂිත කිරීමට. එහෙත් දැන් එය දේශපාලන උවමනාවන් ඉටුකරගන්න ලියවිල්ලක් බවට පත්වෙලා. ත‍්‍රිපිටකයට අනුව මේ මේ දේවල් කරනවා කියලා එක දේවල් ඇතුළත් කරලා මේ ව්‍යවස්ථාවෙන් සෙප්පඩ විජ්ජා පෙන්වනවා.

ත‍්‍රිපිටකයේ කොතැනකවත් පුරාවිද්‍යාව ගැන, සංස්කෘතිය ගැන කතා කරලා නැහැ. මේවා අමූලික බොරු. මේ දේවල් ඇතුළත් කරලා බෞද්ධ අපිව නොමග යවන්න  හදනවා.‘‘