(ඩයනා උදයංගනී)

මාරු මණ්ඩලවල අනුමැතියකින් තොරව වෛද්‍යවරුන් අනුයුක්ත කිරීම සම්බන්ධයෙන් විරෝධය පා හෙට (21) උදෑසන 8.00 සිට දීප ව්‍යාප්ත වෛද්‍ය වර්ජනයක් ආරම්භ කරන බව රජයේ වෛද්‍ය නිලධාරීන්ගේ සංගමය පවසයි.

රජයේ වෛද්‍ය නිලධාරීන්ගේ සංගමයේ මධ්‍යම කාරක සභාව අද(20) රැස්වී සිදුකළ දීර්ඝ සාකච්ඡාවකින් අනතුරුව මෙම තීරණය ගත් බව එම සංගමයේ ලේකම් වෛද්‍ය සෙනාල් ප්‍රනාන්දු මහතා පැවසීය.

මාරු මණ්ඩලවල අනුමැතියෙන් තොරව සෞඛ්‍ය අමාත්‍යංශය මගින් අත්තනෝමතික ලෙස වෛද්‍ය අනුයුක්ත කිරීම් සම්බන්ධයෙන් විරෝධය පා රජයේ වෛද්‍ය නිලධාරීන්ගේ සංගමය අද (20) දිස්ත්‍රික් 5 ක සංකේත වැඩවර්ජනයක් ආරම්භ කළ බවත්, එයට නිසි ප්‍රතිචාරයක් නොලැබුණු බැවින් වෘත්තීය ක්‍රියාමාර්ගය දැඩි කිරීමට තීරණය කළ බවත් වෛද්‍යවරයා සඳහන් කළේය.

දීප ව්‍යාප්ත වැඩවර්ජනයක් ක්‍රියාත්මක වුවත් සියලුම රෝහල්වල හදිසි ප්‍රතිකාර සේවා අවහිරයකින් තොරව අඛණ්ඩව සිදු කිරීමට කටයුතු යොදා ඇතැයි කී ලේකම්වරයා මාතෘ රෝහල්, ළමා රෝහල්, පිළිකා රෝහල් හා වකුගඩු රෝගී ප්‍රතිකාර ඒකකවල මෙම වැඩ වර්ජනය ක්‍රියාත්මක නොවන බව ද කීවේය.

එමෙන්ම කොවිඩ් ප්‍රතිකාර සේවා හා එන්නත්කරණය කිසිදු බාධාවකින් තොරව පවත්වා ගෙන යන බව වෛද්‍යවරයා පැවසීය.