(විනීතා එම් ගමගේ)

රාජ්‍ය බලය හා රාජ්‍ය දේපල අභාවිතය සම්බන්ධයෙන් 2015 ජනාධිපතිවරණයට සාපේක්ෂව මෙවර ජනාධිපතිවරණයට අදාලව ලැබී ඇති පැමිණිලි සංඛ්‍යාව වැඩි බව පැෆරල් සංවිධානයේ විධායක අධ්‍යක්ෂ රෝහණ හෙට්ටිආරච්චි මහතා ප‍්‍රකාශ කළේය.

2015 ජනාධිපතිවරණයේ දී රාජ්‍ය  බලය සහ රාජ්‍ය දේපල අවභාවිතාව පිළිබඳව නොවැම්බර් 11 වැනිදා සිටි දෙසැම්බර් 7  වැනිදා දක්වා පැමිණිලි 05 ක් ලැබී තිබූ අතර මෙවර සැප්තැම්බර් 27 වැනිදා සිට ඔක්තෝබර් 14 වැනිදා දක්වා පැමිණිලි 26 ක් ලැබී ඇතැයි ද හෙතෙම සඳහන් කළේය.    

ජනාධිපතිවරණය ප‍්‍රකාශයට පත් කළ සැප්තැම්බර් 18 වැනිදා සිට මේ දක්වා පැෆරල් සංවිධානය වෙත පැමිණිලි 62 ක් ලැබී ඇති බවත් එයින් බාගයකට වඩා ලැබී ඇත්තේ රාජ්‍ය දේපල අවභාවිතා කිරීම් පිළිබඳ පැමිණිලි යැයි ද හෙට්ටිආරච්චි මහතා පැවසීය.

පැමිණිලි 62 න් 26 ක් රාජ්‍ය දේපල අවභාවිතා කිරීම් සම්බන්ධව බවත් ඒ අතර රැකියා ලබා දීම් ප‍්‍රමුඛ තැනක් ගන්නා බවත් හෙතෙම කියා සිටියේය.

සංවර්ධන ව්‍යාපෘති සහනාධාර වැඩසටහන් මධ්‍යම රජය හරහා මෙන්ම පළාත් පලාන ආයතනවල සහ පළාත් සභාවලත් රැකියා ලබා දීම් සහ අපේක්ෂකයින් ප‍්‍රවර්ධනය සඳහා සම්පත් භාවිතා කිරීම් පිළිබඳව ද තොරතුරු වාර්තා වී ඇතැයි හෙට්ටිආරච්චි මහතා කීය.

රෝහණ හෙට්ටිආරච්චි මහතා මේ අදහස් පළ කළේ මරදාන සමාජ හා සාමයික කේන්ද්‍රයේ අද (15) පැවති මාධ්‍ය හමුවක් අමතමිනි.

කෙසේ වෙතත් ඉතිහාසයේ වැඩිම අපේක්ෂකයන් පිරිස ඉදිරිපත් වී සිටින මෙවර ජනාධිපතිවරණයේ දී මේ වනතුරුත් කිසිඳු ප‍්‍රචණ්ඩ ක‍්‍රියාවක් වාර්තා නොවීම සාධනීය ලක්ෂණයක් යැයි ද ජනතාව, දේශපාලඥයන් හා මැතිවරණ ව්‍යාපාරය පිළිබඳව යම් තරමක සවිඥානික වීම දියුණු දේශපාලන සංස්කෘතියක මූලික ලක්ෂණ පෙන්නුම් කරන බව ද ඔහු කියා සිටියේය.

ඇල්පිටියේ පළාත් පාලන මැතිවරණයෙන් උගත හැකි පාඩම් ඇතැයි ද එහි දේශපාලඥයින් කිසියම් විනයක් හා සංයමයක් ඇතිව මැතිවරණ ව්‍යාපාරය කි‍්‍රයාත්මක කළේ යැයි ද කී හෙට්ටිආරච්චි මහතා එය සමස්ත රට තුළම පවත්වා ගන්නැයි සියලු දේශපාලඥයින් ගෙන් ඉල්ලීමක් ද කළේය.

මැතිවරණය නිරීක්ෂණය කිරීම සඳහා 6000 පිරිසක් යොදවන බවත් දිවයිනම ආවරණය වන පරිදි ඔවුන් නිරික්ෂණ කටයුතු කරනු ඇති බවත් කී පැෆරල් විධායක අධ්‍යක්ෂවරයා මේ වනවිටත් සැම මැතිවරණ කොට්ඨාශයක්ම ආවරණය වන පරිදි දිගුකාලින නිරීක්ෂකයන් 160 දෙනෙකු නිරීක්ෂණ කටයුතුවල යෙදෙන බව ද පැවසීය.

එමෙන්ම සර්ව පාක්ෂික මෙහෙයුම් මැදිරියක් සෑම දිස්ත‍්‍රික්කයකටම ස්ථාපනය කර ඇති බවත් ඒවායේ පැමිණිලි ඒකක ක‍්‍රියාත්මක වන බවත් කී හෙට්ටිආරච්චි මහතා ජනාධිපතිවරණයේ තැපැල් ඡන්දය පැවැත්වෙන දින හතරේ දී නිරීක්ෂකයන් දහසක් දෙනා එම කටයුතු නිරීක්ෂණය කරන බව ද කීය.

එමෙන්ම ලැබෙන පැමිණිලි විමර්ශනය කර ඒ සම්බන්ධ කඩිනමින් ක‍්‍රියාත්මක වීම සඳහා විශේෂ මැතිවරණ නිරීක්ෂණ ඒකකයක් ස්ථාපිත කරන්නට පැෆරල් සංවිධානය කටයුතු කර ඇතැයි ද පළපුරුදු නීතිඥයන් ඇතුළු 20 දෙනෙකුගේ කණ්ඩායමක් එම ඒකකයට අනුයුක්ත කර ඇති බවත් ඔහු සඳහන් කළේය.

පැෆරල් සංවිධානය ඉතිහාසයේ පළමුවතාවට සමාජ මාධ්‍ය නිරීක්ෂණය ආරම්භ කළ බවත් ඒ සඳහා කණ්ඩායම් දෙකක් යොදවා ඇති බවත් කී හෙට්ටිආරච්චි මහතා වෛරි ප‍්‍රකාශන වැරදි තොරතුරු වැරදි අර්ථකතන ඇතුළත් නොමග යවන හෝ ජනතාව නොසන්සුන් කරන ප‍්‍රකාශ පිළිබඳව නිරීක්ෂණය කර ඒවා මැතිවරණ කොමිසමේ අධීක්ෂණයෙන් අනතුරුව ශ්‍රී ලංකාවේ ෆේස්බුක් නියෝජිතයන්ට යොමුකර අවශ්‍ය ක‍්‍රියාමාර්ග ගනු ඇති බවත් හෙතෙම පවසා සිටියේය.