2021 ඔක්තෝබර් මස 21 වන බ්රහස්පතින්දා
(බිමල් ශ්‍යාමන් ජයසිංහ )
රාජකාරී හැඳුනුම්පත උපයෝගී කරගෙන හොරෙයින් මත්කුඩු ජාවාරමේ යෙදුණු දෙහිවල ගල්කිස්ස මහා නගර සභාවේ කම්කරු සේවකයෙකු රුපියල් හතළිස් දහසක් වටිනා මත්කුඩු සමඟ බණ්ඩාරගම කිඳෙල්පිටිය ප්‍රදේශයේදී අද (10 ) අත්අඩංගුවට ගත් බව බණ්ඩාරගම පොලිසිය කියයි .
සැකකරු සන්තකයේ තිබී හොරෙයින් මත් කුඩු මිලිග්‍රෑම් දෙදෙහස් හයසිය විස්සක් පොලිස් භාරයට ගෙන ඇත.
දෙහිවල සිට ත්‍රිරෝද රථයකින් පුද්ගලයෙකු බණ්ඩාරගම වැල්මිල්ල ප්‍රදේශයට මත් කුඩු ප්‍රවාහනය කරන බවට බණ්ඩාරගම පොලිසියේ ස්ථානාධිපති ප්‍රධාන පොලිස් පරීක්ෂක ලසන්ත බුද්ධික මහතාට ලද තොරතුරක් අනුව සැකකරු අත්අඩංගුවට ගැනීමට හැකි වූ බව පොලිසිය සදහන් කරයි.
අත්අඩංගුවට ගත් මෙම සැකකරු ගල්කිස්ස බඩෝවිට සිට බණ්ඩාරගම ප්‍රදේශයට මත් කුඩු ප්‍රවාහනය කර ජාවාරම සිදු කරන බවට සිදුකළ විමර්ශන වලදී අනාවරණ වූ බව පොලිසිය කියයි .
සැකකරු මත්කුඩු පානයට සඳහා දැඩිව ඇබ්බැහි වූවකු බව ද ඒ සඳහා මුදල් සොයා ගැනීමට සිදු කරනු ලබන්නේ මත් කුඩු පැකට් කර විකුණන බව ද වැඩිදුර විමර්ශන වලදී අනාවරණය වූ බව පොලිස් නිලධාරියෙකු පැවසීය .
