(රොමේෂ් ධනුෂ්ක සිල්වා චීනයේ බෙයිජිං නුවර සිට)

චීන රජයේ පූර්ණ අනුග‍්‍රහය යටතේ ෂැන්හයි සහයෝගිතා සංවිධානය  විසින් සංවිධානය කරනු ලබන ‘‘ යුරෝ ‐ ඒෂියා ඉකොනොමික්ස් ෆෝර්ම් ’’ හෙවත් යුරෝ ‐ ආසියා ආර්ථික සමුළුව චීනයේ ෂියෑන් නුවරදී හෙට (10) ආරම්භ කෙරේ.

චීන ජනාධිපති ෂී ජින් පින්ග් මහතාගේ උපදෙස් හා අධීක්ෂණය යටතේ 2005  වසරේ සිට දෙවසරකට වතාවක් පැවැත්වෙන මෙම යුරෝ ‐ ආසියා ආර්ථික සමුළුව මෙවර පැවැත්වෙනුයේ සත් වැනි වතාවටය.

සමුළුවේ සමාරම්භය චීන මහජන කොමියුනිස්ට් පක්ෂයේ දේශපාලන මණ්ඩලයේ ප‍්‍රධාන සමාජිකයෙකුගේ ප‍්‍රධානත්වයෙන් පැවැත්වෙන අතර ලෝකයේ ප‍්‍රධාන පෙලේ රටවල් කිහිපයක නියෝජිතයින් , පෞද්ගලික සමාගම් 500 ක නියෝජිතයින්ද මීට සහභාගී වෙති.

‘‘එක් තීරයක් ‐ එක් මාවතක් යන තේමාව යටතේ පැවැත්වෙන මෙම සමුළුවේදී ආසියාව හා යුරෝපා එකමුතුවේ රටවල් අතර සුහදත්වය වර්ධනය කර ගැනීමත් , ලෝකය ඉදිරියේ ඇති විවිධ අභියෝගයන් සාකච්ඡා කිරීම ප‍්‍රධාන අරමුණ වන්නේ යැයි එහි සංවිධායකයෝ කියා සිටිති.

යුරෝ ‐ ආසියා ආර්ථික සමුළුවේ ප‍්‍රධාන සමාරම්භක රැස්වීමට සමගාමීව ආර්ථික , සංස්කෘතික , සංචාරක , දේශගුණික , විද්‍යා හා තාක්ෂණ , අධ්‍යාපනික , පරිසර හිතකාමී බව ඇතුළු කාරණා 10 ක් සම්බන්ධ සමාන්තර සැසියන් පැවත්වේ.