කොරෝනා වයිරසයේ ව්‍යාප්තියත් සමඟ සමස්ත රටම දැවැන්ත නිරෝධායන ක්‍රියාවලියකට ලක් කිරීමට ඉතාලිය අද (10) පියවර ගත්තේය.

ගෝලීයව ව්‍යාප්ත වෙමින් තිබෙන කොරෝනා වයිරසයට එරෙහිව චීනය ගෙන යන සටනේදී ඔවුන් ප්‍රගතියක් පෙන්නුම් කර ඇති නමුත් ඉන් ඉතාලියට ඉන් බරපතළ බලපෑමක් එල්ල වී තිබේ.

නිරෝධායන ක්‍රියාමාර්ග හේතුවෙන් ඉතාලියේ මිලියන 60ක ජනතාව විවිධ බාධකවලට මුහුණ දී ඇතැයි ද වාර්තා වේ.

කොරෝනා වයිරසයේ බලපෑම නිසා ගෝලීය තෙල් වෙළෙඳපොළේ බොරතෙල් මිල ගණන් පහත වැටුණු අතර මූල්‍ය වෙළෙඳපොළවල ද දරුණු පසුබෑමක් පෙන්නුම් කළේය.

චීනයේ හුබෙයි පළාතේ වූහාන් නගරයෙන් ව්‍යාප්ත වීමට පටන් ගත් කොරෝනා වයිරසය මේ වනවිට 100කට වැඩි සංඛ්‍යාවකට ව්‍යාප්ත වී ගොස් තිබේ. කොරෝනා වයිරසයෙන් මියගිය ගණන 4,000ඉක්මවා ඇති අතර ආසාදිතයන්ගේ ගණන 110,000 ඉක්මවා ඇත.

කොරෝනා වයිරසය ලෝක වසංගතයක් බවට පත්වීමේ දැඩි අවදානමක් ඇතැයි ද ලෝක සෞඛ්‍ය සංවිධානය ඊයේ අනතුරු ඇඟවීය.

කෙසේ නමුත් කොරෝනා වයිරසය මැඬීමේ සටනේදී චීනය මේ වනවිට සැලකිය යුතු ප්‍රගතියක් පෙන්නුම් කර ඇත. චීන ජනාධිපති ෂී ජින්පින්ග් ද අද වූහාන් නගරයේ නිරීක්ෂණ සංචාරයක නිරත විය. මාරාන්තික කොරෝනා වයිරසය ව්‍යාප්ත වීම ආරම්භ වූයේ මෙම වූහාන් නගරයෙනි.

ජනවාරි මාසයේ සිට චීනයේ හුබෙයි පළාතේ ගමන්බිමන් සීමා කරමින් දැවැන්ත නිරෝධායන ක්‍රියාවලියකට ලක් කර තිබේ. ඒ හේතුවෙන් මිලියන 56කට වැඩි පිරිසක් ඔවුන්ගේ නිවාසවලට කොටු වී සිටියහ. පනවා තිබූ සීමා ලිහිල් කිරීමට පියවර ගන්නා බව චීන බලධාරීහු ජනාධිපති ෂී ජින්පින්ග් වූහාන් නගරයේ සංචාරය කිරීමෙන් පසු ප්‍රකාශ කළහ. 

ඒ.එෆ්.පී.

055