(රොමේෂ් මධුෂංඛ)

කිලිනොච්චිය, පලෙයි මුහමාලෙයි ප්‍රදේශයේ මිනිස් අස්ථි හා ආයුධ කොටස් හමු වූ ස්ථානයේ ඊයේ සහ අද (23) දිනයන්හි කළ තවත් කැණීමකදී එල්.ටී.ටී.ඊ. සංවිධානයට අයත් නිලඇඳුම්, බෝම්බ, එල්.ටී.ටී.ඊ. සංවිධානයේ නායක ප්‍රභාකරන්ගේ ඡායාරූපයක්, ආයුධ හා මිනිස් අස්ථි කොටස් බවට සැකකෙරෙන අස්ථි කිහිපයක් හමු වූ බවට කිලිනොච්චිය පොලීසිය පවසයි.
 
පසුගිය මැයි 22 වැනිදා අදාළ ස්ථානයේ බිම්බොම්බ ඉවත් කිරීමේ කටයුතුවල නිරත රාජ්‍ය නොවන සංවිධානයකට කොටි සංවිධානය සතු නිලඇඳුම් හා ගිනි අවි කොටස් කිහිපයක් සමගින් මිනිස් අස්ථි කිහිපයක්ද හමු වී තිබිණි. පසුව කිලිනොච්චි මහෙස්ත්‍රාත් ටී. සර්වනරාජා මහතාගේ ප්‍රධානත්වයෙන් මැයි 26 වැනිදා සහ ජුනි 2 වැනිදා අදාල ස්ථානයේ පළමු සහ දෙවන අදියරේ කැණීමට කිලිනොච්චිය පොලීසිය විසින් පියවර ගනු ලැබීය.
 
එම කැනීම්වලදී ද යුද උපකරණ රැසක්, කොටි සාමාජිකයින්ගේ නිලඇඳුම් හා අස්ථි කොටස් කිහිපයක් හමු විය.
 
කරන ලද කැනීම්වලදී අත් බෝම්බ තුනක්, ටී.56 ගිනිඅවියක්, කොටි සාමාජිකයින් පළඳින සයිනයිඩ් කරලක්, ගෙලෙහි පළඳන ටැග් එකක්, එම සංවිධානයේ නිලඇඳුම් කිහිපයක්, කොටි නායක ප්‍රභාකරන්ගේ ඡායාරූපයක් හා මිනිස් අස්ථි බවට සැකකෙරෙන අස්ථි කොටස් කිහිපයක් හමු වී ඇත.
 
අද දිනයේ ද වැඩිදුරටත් කැණීම් කරන බව පරීක්ෂණ සිදුකරන කිලිනොච්චිය පොලීසිය වැඩිදුරටත් පැවසීය.