මරණ දඬුවම ක්‍රියාත්මක කිරීමට පෙර පාකිස්තානයේ හිටපු ජනපති පර්වේස් මුෂාරෆ් මහතා මියගියේ නම්, ඔහුගේ මළ සිරුර  පාර්ලිමේන්තුව ඉදිරිපිට දින තුනක් එල්ලා තබන්නැයි පාකිස්තානු විශේෂ අධිකරණය අද (19) නියෝග කර ඇත.

ආණ්ඩුක්‍රම ව්‍යවස්ථාව උල්ලංඝණය කිරීම හා හදිසි නීතිය පැනවීම වෙනුවෙන් රාජද්‍රෝහීව ක්‍රියාකිරීම සම්බන්ධයෙන් හිටපු ජනපතිවරයාට පසුගිය අඟහරුවාදා (17) මරණ දණ්ඩනය නියම විය.

මරණ දඬුවම නියම කිරීමේදී එම වගන්තියේ වරදක් තිබී ඇති බව පාකිස්තානු රජය විසින් පැවසීමෙන් පසු අභියාචනයක් ඉදිරිපත් කිරීමට මුෂාරෆ් මහතා සූදානමින් සිටින බවට ඔහුගේ නීතීඥවරුන් කළ ප්‍රකාශයකට අනුව මෙම නියෝගය නිකුත් කර තිබේ.

දැනට 76 හැවිරිදි වියේ පසුවන මුෂාරෆ් මහතා පකිස්තානයෙන් බැහැර වී ඩුබායි නුවරදී වෛද්‍ය ප්‍රතිකාර ලබමින් සිටී.

පකිස්තානයේ හිටපු අගමැති නවාස් ෂරීෆ් මහතා විසින් මුෂාරෆ්ට එරෙහිව 2014 වර්ෂයේ දී රාජද්‍රෝහී ක්‍රියාකිරිම සම්බන්ධයෙන්  මෙම නඩුව ගොනු කරන ලදී. නවාස් ෂරීෆ් වර්ෂ 2013 යළි බලයට පත්වීමෙන් පසුව නඩුව ගොනු කර ඇත.

මුෂාරෆ්ට සාධාරණ නඩු විභාගයක් ලබා නොදුන් බව නීතිපති අන්වර් මන්සූර් මහතා සඳහන් කරයි.


(රොයිටර් ඇසුරිනි)