(ලක්ෂ්මී ජයකොඩි)
 
තමන් ජීවතුන් අතර සිටිනතාක් කල් ඉලංගෙයි තමිල් අරසු කච්චි හෝ දෙමළ ජාතික සන්ධානය හා එක් නොවන බව ද්‍රවිඩ එක්සත් විමුක්ති පෙරමුණේ නායක ආනන්ද සංගරී මහතා පැවසීය. ඒ මහතා මේ බව කියාසිටියේ යාපනයේදි පැවැත්වු මාධ්‍ය හමුවේදීය.
 
යුද්ධයේ අවසන් මෙහෙයුම්වලදි දහස් ගණනක් ජනතාව මිය යාමට දෙමළ ජාතික සන්ධානයේ නායක ආර් සම්බන්දන් හා ඉලංගෙයි තමිල් අරසු කච්චි පක්ෂයේ නායක මාවෙයි සේනාධිරාජා යන මහත්වරු හේතු වු බවද හෙතෙම කීය. මෙම මාධ්‍ය හමුවේදි වැඩිදුරටත් අදහස් දැක්වු සංගරී මහතා මෙසේද කීවේය.
 
"දෙමළ ජාතික සන්ධානය තහනම් කළ යුතු බවට එක්තරා අමාත්‍යවරයෙක් පාර්ලිමේන්තුවේදි ප‍්‍රකාශ කර තිබෙනවා. එම අමාත්‍යවරයාගේ ප‍්‍රකාශය මමත් අනුමත කර තිබෙනවා යැයි ඇතැමුන් චෝදනා කර තිබුණා. නමුත් මගේ අදහස හා අදාළ අමාත්‍යවරයාගේ අදහස වෙනස් බව පැහැදිලි කළ යුතුව තිබෙනවා.
 
යුද්ධයේදි දහස් ගණනක් ජනතාව මිය ගියා. එම සියලූ ජනතාව මිය යාමට හේතු වුණේ සම්බන්දන් හා මාවෙයි සේනාධිරාජා යන දෙදෙනායි. එවක ඔවුන්ගේ පාර්ලිමේන්තු මන්තී‍්‍රවරුන් 20දෙදෙනෙකු පාර්ලිමේන්තුවේ සිටියත්   ඔවුන් එල්ටීටීඊ සංවිධානය හා සබඳතා පවත්වමින් සිටියා. එල්ටීටීඊ සංවිධානය විනාශ කිරීමේදි සම්බන්දන්ට හා මෙවෙයි සේනාධිරාජා යන දෙදෙනාට කිසිදු සම්බන්ධතාවයක් නැතැයි කියන්නේ නම් කිසිවිටෙකත් මම එය පිළිගන්නේ නැහැ. ඔවුන් දෙදෙනා ඊට සෘජුව සම්බන්ධයි. 2009 වසරේදි ඔවුන්ට අවශ්‍යතාවක් තිබුණේ නම් යුද්ධය නතර කරන්න තිබුණා. නමුත් එයට කැමැති වුයේ නැහැ.
 
ඔවුන් යුද්ධය කාලයේදි විදෙස් රටවල සුඛෝපභෝගි ජීවත ගත කළා. එබැවින් මා මිය යන තෙක් ඉලංගෙයි තමිල් අරසු කච්චි හෝ දෙමළ ජාතික සන්ධානය සමග එක් වන්නේ නැහැ.මගේ එකම අරමුණ අපේ ජනතාවයි ප‍්‍රශ්න විසදෙනු දැකීමයි. නමුත් තිබුණු අවස්ථා ඔවුන් විනාශ කර දැමුවා. ෆෙඩරල් විසදුම් කරා ළගා වුණා. සිංහල ජනතාවගෙන් 49% ක් එයට එකඟ වුණා. කාගෙන් හෝ මුදල් ලබාගෙන එයට විරුද්ධව ප‍්‍රචාරණයන් පැවැත්වුයේ සම්බන්දන් , සේනාධිරාජා දෙදෙනායි.

සිංහල ඡන්ද පමණක් ප‍්‍රමාණවත් බව පැවසු රාජපක්ෂ ආණ්ඩුවට 50.3 ක ඡන්ද ප‍්‍රතිශතයක් ලැබුණා. එම දශම තුනක ඡන්ද නොලැබුණා නම් ප‍්‍රශ්නය එතැනින් අවසන් වෙන්න තිබුණා. තවත් දෙමළ ඡන්ද 50 ක් අනෙක් පාර්ශවයට ලැබී තිබුණා නම් රාජපක්ෂ එදා පාරාජය වෙනවා. එදා එයාකාරයෙන් රාජපක්ෂවරු දිනවල වර්තමානේයේදි සම්බන්දලා මාවෙයිලා අපට ගෝනී බිල්ලෝ පෙන්වනවා.

මට අවශ්‍ය වුයේ දෙමළ ජනතාවගේ ප‍්‍රශ්න විසදෙනු දැකීමයි. ජාතික ගැටලුවට සම්පුර්ණ ෆෙඩරල් විසදුමක්ම ලැබේ යැයි විශ්වාසයක් මට තිබුණෙ නැහැ. එකීය රාජ්‍ය සංකල්පය යටතේ විසදුමක් අපට ගැලපෙන්නෙත් නැහැ. එයට අපි කැමැති නැහැ.මෙම විසදුම පිළිබදව මම මැතිඇමතිවරු සමග සාකච්ඡා කළා. එහිදි මම යෝජනා කළේ ඉන්දියානු මොඩලයේ විසදුමක් ලබාදීමට කටයුතු කරන ලෙසයි.
 
දෙමළ ජාතික සන්ධානය ලැබී තිබු සියලු අවස්ථා විනාශ කර ගත්තා . ඔවුන් දෙමළ ජනතාවට ද්‍රෝහිකම් කර තිබෙනවා. මොවුන්ව ඔවුන්ගේ තනතුරුවලින් පහ කිරීමට කටයුතු කළ යුතුයි" යැයිද පැවසීය.