(අජිත්ලාල් ශාන්තඋදය)

තරුණයකුට මරු කැඳවමින් මාරක රිය අනතුරක් සිදුකළ බවට සැකපිට අත්අඩංගුවට ගෙන රක්ෂිත බන්ධනාගාරගත කළ හිමි නමක් රුපියල් ලක්‍ෂ 15 ක ශරීර ඇපයක් මත නිදහස් කරන ලෙස රත්නපුර අතිරේක මහේස්ත්‍රාත් දුලාන් වීරවර්ධන මහතා අද (17) නියෝග කළේය.

මෙසේ ඇපමත මුදාහැරුණේ කලවාන පොතුපිටිය මිළිඳුතලාව ආරණ්‍ය සේනාසනයේ ඌරුමීවල කුසලඥාණ නැමැති හිමිනමකි.

කලවාන රත්නපුර ප්‍රධාන පාරේ උඩකරවිට දෙනියකඩේ ප්‍රදේශයේදී පසුගිය 13 වැනිදා සවස සිදුවූ කැබ්රථ අනතුරකින් 19 හැවිරිදි තරුණයෙක් මිය ගොස් තිබූ අතර තවත් තරුණයෙක් තුවාල ලබා රෝහල් ගත කර තිබුණි.

අනතුරට පත් කැබ් රිය පදවා තිබුණේ සැකකාර හිමිනම විසිනි. එම හිමිනමට රියදුරු බලපත්‍රයක් නැති බව නිවිතිගල පොලිසිය බී වාර්තාවක් මගින් අධිකරණයට කරණු වාර්තා කර ඇත.

තුවාල ලැබූ සහ මියගිය තරුණයන් දෙදෙනා ඔවුන් පැමිණි යතුරුපැදිය  පාර අයිනේ නවතා සිටියදී මෙම අනතුර සිදුව තිබුණි.

නිවිතිගල පොලිසිය විසින් සැකකාර හිමිනම අත්අඩංගුවට ගෙන රත්නපුර වැඩබලන මහේස්ත්‍රාත් විජය තෙන්නකෝන් මහතා හමුවට 14 වැනිදා ඉදිරිපත් කිරීමෙන් පසු අද (17) දක්වා රිමාන්ඩ් භාරයේ තැබීමට නියම කරනලදී.

ඒ අනුව අද (17) මෙම නඩුව කැඳවූ අවස්ථාවේ නීතීඥ ලලිත් පීරිස් සහ නෙවිල් කරුණාත්න යන මහත්වරු සැකකාර හිමිනමට ඇප ලබාදෙන ලෙස ඉල්ලා සිටියේය.

එම ඉල්ලීම සැලකිල්ලට ගත් අතිරේක මහේස්ත්‍රාත්වරයා රුපියල් ලක්‍ෂ 15 ක ශරීර ඇපයක් මත හිමිනම මුදාහැරීමට නියම කළේය.

වැඩිදුර විභාගය 2020 මාර්තු මස 17 දිනට කල් තැබිණි.