(බිමල් ශ්‍යාමන් ජයසිංහ)

දෙනෝ දහසක් බලා සිටියදී අතුරුගිරිය ප්‍රදේශයේ පශු වෛද්‍යවරයෙකු ඇතුළු  පුද්ගලයන් තිදෙනෙකුට  අමානුෂික ලෙස  පහරදී එක් අයකු උස්සා පොළොවේ ගැසීමේ   සිද්ධියක් සම්බන්ධයෙන් පුද්ගලයන් 5දෙනෙකු අද (5) අත්අඩංගුවට ගත් බව අතුරුගිරිය පොලිසිය කියයි.

අත්අඩංගුවට ගත් එම පිරිස අතර බස්රථ හිමියකුගේ පුතකු සහ  කායවර්ධන මධ්‍යස්ථානයක හිමිකරුවකු ද සිටින බව පොලීසිය සඳහන් කරයි.

ඉකුත් 31 රාත්‍රී  අතුරුගිරිය  ප්‍රදේශයේ  අවන්හලක් ඉදිරිපිටදී මෙම පහරදීම සිදුවී තිබු බව පොලිසිය කියයි.

ප්‍රධාන සැකකරු වන  බස්රථ හිමිකරුගේ පුතු, අතුරුගිරිය ප්‍රදේශයේ අවන්හලක වෙත ආහාර මිලදී ගැනීම සඳහා  පැජරෝ ජීප් රථයකින්  පැමිණ තිබිණි. එය වාහන නවතා තබන ස්ථානයේ නැවැත්වීමට ඉඩකඩ මදි වීම පිළිබඳව එම අවන්හලට පැමිණ වාහනයකින් පැමිණ සිටි පශු වෛද්‍යවරයකු යටතේ සේවය කරන මුදල් අයකැමි වරයෙකු   සමග බහින් බස් වීමක් සිදුවී තිබූ බව පොලිසිය කියයි.

අනතුරුව බස්රථ හිමිකරුගේ සැකකාර  පුතු විසින් දුරකථන ඇමතුම් දී තවත් පිරිසක් එම ස්ථානයට ගෙන්වා ගෙන එම පුද්ගලයාට පහරදී උස්සා පොළොවේ ගසා ඇත.  නැවතත් පිරිස  සමග වටකර පහර දෙමින් සිටියදී එය සැළ වී තිබූ පශු වෛද්‍යවරයා එහි පැමිණ තිබිණි. ඔහු එය සමථයට පත් කිරීමට උත්සහ කිරීමේදී එම පිරිස වෛද්‍යවරයාට සහ කළමනාකරුවකුට පහරදී තිබු බව පොලිසිය කියයි.