(*** සුජිත් හේවාජුලිගේ)

පාර්ලිමේන්තුවේ මන්ත්‍රීවරයකුගේ කෑම වේල හා ඊට වැයවන මුදල සම්බන්ධයෙන් සම්පූර්ණ විස්තර වාර්තාවක් මැතිසබයට ලබන සතියේදී ඉදිරිපත් කිරීමට නියමිතය.

මේ සම්බන්ධයෙන් සම්පූර්ණ විස්තර වාර්තාවක් මැතිසබයට ඉදිරිපත් කරන්නැයි ආණ්‍ඩු පක්ෂයේ හා විපක්ෂයේ මන්ත්‍රීවරුන් පිරිසක් කතානායකවරයාගෙන් ඉල්ලීමක් කර තිබෙන අතර මෙම වාර්තාව මැතිසබයට ඉදිරිපත් කෙරෙන්නේ ඒ අනුව යැයි පාර්ලිමේන්තු නිලධාරියෙක් පැවැසීය.

මේ අතර මන්ත්‍රීවරයකුගේ කෑම වේලක් සඳහා වැයවන නියම වියදම ගණනය කරන්නැයි පාර්ලිමේන්තුවේ මහලේකම් ධම්මික දසනායක මහතා ආපනශාලා ගිණුම් අංශයේ නිලධාරීන් කණ්ඩායමකට නියෝග කර තිබෙන අතර එම ගණනය කිරීමේ කටයුතු ඊයේ (31) සිට අරඹනු ලැබ ඇත.

පාර්ලිමේන්තු මන්ත්‍රීවරයකුගේ කෑම වේල සම්බන්ධයෙන් පසුගිය දිනවල මැතිසබා රැස්වීම්වලදී ද උණුසුම් කතාබහක් ඇතිවිය.

පාර්ලිමේන්තු මන්ත්‍රීවරයකුගේ කෑම වේලක් සඳහා වැයවන මුදල සම්බන්ධයෙන් සමාජ මාධ්‍ය ඔස්සේ වැරදි ගණන් හිලව් ඉදිරිපත් වන හෙයින් ඒ සම්බන්ධයෙන් නිවැරදි සංඛ්‍යාලේඛන මැතිසබයට වහාම ඉදිරිපත් කරන්නැයි ආණ්‍ඩු පක්ෂයේ හා විපක්ෂයේ මන්ත්‍රීවරු රැසක් කතානායකවරයාගෙන් එම රැස්වීම්වලදී ඉල්ලා සිටියහ.

මන්ත්‍රීවරයකුගේ කෑම වේලක් සඳහා රුපියල් තුන්දහසක පමණ මුදලක් වැයවන බවට පාර්ලිමේන්තු නිලධාරියකු පැවැසී යැයි ඇතැම් සමාජ මාධ්‍ය ජාලා ද වාර්තා කර තිබූ අතර එම සමාජ මාධ්‍ය ජාලා වාර්තා නිසා ද මන්ත්‍රී ආහාර වේල සම්බන්ධයෙන් රටේ ලොකු කතාබහක් ඇතිවිය.

පාර්ලිමේන්තුව ලබන 8, 9, 10 හා 11 දිනවල රැස්වීමට නියමිතය.