යුද හමුදාව සහ පොලිසිය ඒකාබද්ධව මල්වාන ප්‍රදේශයේ ඊයේ (29) සිදු කළ සෝදිසියකදී මුදල් අමාත්‍යාංශයේ මාධ්‍ය අධ්‍යක්ෂවරයාගේ නිවසේ බෝර 12 ගිනි අවිවලට යොදන පතුරම් 93 ක් සොයාගෙන තිබේ. මෙම සිද්ධිය සම්බන්ධයෙන් මුදල් අමාත්‍යාංශයේ මාධ්‍ය අධ්‍යක්ෂවරයා අත්අඩංගුවට ගනු ලැබුවද පසුව ඔහුගෙන් ප්‍රකාශයක් සටහන් කරගෙන ඊයේ පස්වරුවේම ඔහු මුදා හැරිය බවද පොලිස් මාධ්‍ය ප්‍රකාශකවරයා කීය.

භට කණ්ඩායම් විසින් මාධ්‍ය අධ්‍යක්ෂවරයාගේ මල්වාන මල්වත්තේ පිහිටි නිවස පරීක්ෂා කිරීමේදී එහි වහල සහ සිවිලිම අතර එළිමහන් කොටසේ මේවා සඟවා තිබිණැයි පොලිස් මාධ්‍ය ප්‍රකාශක පොලිස් අධිකාරී රුවන් ගුණසේකර මහතා පැවැසීය.
 
මල්වාන ප්‍රදේශයේ ඒකාබද්ධ සෝදිසි මෙහෙයුම ඊයේ අලුයම 5.00 සිට දහවල් 12.00 දක්වා පැවැති අතර මේ සඳහා යුද හමුදාවේ භටයින් 700ක් හා පොලිසියේ 100ක් සහභාගී වූ බව පොලිස් ආරංචි මාර්ග පවසයි. මෙහිදී නිවාස හා වෙළඳසැල් 700කට අධික ප්‍රමාණයක් සෝදිසියට ලක්කර තිබිණි. මුදල් අමාත්‍යාංශයේ ප්‍රවෘත්ති අධ්‍යක්ෂවරයාගේ නිවසද මෙසේ සෝදිසියට ලක් කෙරුණු නිවාස අතර විය.

සෝදිසි මෙහෙයුමේදී සොයාගත් සෙසු භාණ්ඩ අතර කඩු දෙකක්, පාස්කු දිනයේ එල්ල වූ බෝම්බ ප්‍රහාරවල වීඩියෝ දර්ශන සහිත ජංගම දුරකතන දෙකක්, රසායනික ද්‍රව්‍ය සහිත ප්ලාස්ටික් කෑන් දෙකක්, යුද හමුදා නිල ඇඳුම්වලට සමාන ජැකට් 10 ක්,  කලිසම් 6 ක් සහ පතුරොම් රඳවනයක් ද තිබූ බව පොලිසිය සඳහන් කරයි.

මෙම භාණ්ඩවලට අමතරව අයිතිය තහවුරු කිරීමට අපොහොසත් වූ මෝටර් රථයක් ද පොලිස් බාරයට ගෙන ඇත.

මෙම මෙහෙයුමේදී පුද්ගලයන් 13 දෙනෙකු සැකපිට අත්අඩංගුවට ගෙන ඇති අතර ඔවුන් සියලු දෙනාම බියගම පොලිසියට බාරදී ඇත.