(අජන්ත කුමාර අගලකඩ )  
 
ලබන වසර මැතිවරණ වසරක් බැවින් ඊට මුහුණදීමට සූදානම් වන්නැයි ජනාධිපති මෛත්‍රිපාල සිරිසේන මහතා ශ්‍රී ලංකා නිදහස් පක්ෂයේ ආසන සංවිධායකවරුන්ට අද (24) දැනුම් දී ඇත.  
                                   
පළාත් සභා මැතිවරණය සහ ජනාධිපතිවරණය ලබන වසරේ පැවැත්වෙන බවත් ඇතැම්විට මහමැතිවරණය වුවද ලබන වසරේ පැවැත්විය හැකි බවත් ජනාධිපතිවරයා ප්‍රකාශ කර ඇත. 
                                             
ජනාධිපතිවරයා මේ බව ප්‍රකාශ කළේ ජනාධිපති ලේකම් කාර්යාලයේ අද(24)  පෙරවරුවේ පැවති ශ්‍රී ලංකා නිදහස් පක්ෂ ආසන සංවිධායකවරුන්ගේ රැස්වීම අමතමිනි.  
                                                  
සංවිධායකධුර පුරප්පාඩුව පවතින ආසනවලට සහ සංවිධායකයින් සිටින ආසනවලට අලුතින් සංවිධායකවරුන් ජනවාරි මස මුලදී පත්කරන බවද ජනාධිපතිවරයා සඳහන් කළ බව ශ්‍රී ලංකා නිදහස් පක්ෂ මහලේකම් මහාචාර්ය රෝහණ ලක්ෂ්මන් පියදාස මහතා සඳහන් කළේය. 
                                                       
බණ්ඩාරනායක දිනය යෙදෙන ලබන මස 8වැනිදා පක්ෂයේ ප්‍රතිසංවිධාන කටයුතු අලුත් මුහුණුවරකින් ආරම්භ කරන බවත් සංවර්ධන කටයුතු රැසක් එදින ජනතා අයිතියට පැවරීමට කටයුතු යොදා ඇති බවත් ජනාධිපතිවරයා සඳහන් කළේ යැයි මහලේකම්වරයා කීය. 
                                       
පක්ෂයේ ප්‍රතිසංවිධායක වැඩපිළිවෙළ පිළිබඳව ආසන සංවිධායකවරුන්ගේ රැස්වීමේදී පුළුල් ලෙස සාකච්ඡා වූ බවද ඔහු කීවේය.