(ක.ග.කරුණාරත්න)

මනම්පිටිය මාගංතොට ප‍්‍රදේශයේදී ගිනි අවියකින් වෙඩි තබා පුද්ගල ඝාතනයක් සිදුකිරීමට තැත්කළ බව කියන අයෙකු පොලොන්නරුව පොලීසිය මගින් අත් අඩංගුවට ගෙන අධිකරණයට ඉදිරිපත් කිරීමෙන් පසු ලබන මස 05 වෙනි දින දක්වා රිමාන්ඞ් බන්‍ධනාගාර ගතකරන ලෙසට පොලොන්නරුව මහේස්ත‍්‍රාත් අසේලද සිල්වා මහතා අද(23) නියෝග කලේය.

මෙසේ රිමාන්ඞ් බාරයට පත් කරන ලද්දේ මනම්පිටිය,මාගස්තොට පදිංචි ගමගේ ජානක සංජය යන අයයි.

මනම්පිටිය මාගස්තොට ප‍්‍රදේශයේදී සැකකරු තවත් පුද්ගලයෙකු සමඟ ආරවුලක් ඇතිකර ගෙන මෙම වෙඩි තැබීම සිදු කිරීමෙන් පසුව පොලීසිය මඟහරිමින් සිටියදී අත් අඩංගුවට ගනු ලැබූ බව පොලීසිය අධිකරණයට කරුණු වාර්තා කරමින් කියා සිටියේය.

පොලොන්නරුව පොලීසියේ අපරාධ විමර්ශණ අංශයේ පොලිස් කණ්ඩායමක් සැකකරු අත් අඩංගුවට ගෙන අධිකරණයට ඉදිරිපත් කරනු ලැබූහ.