( සිතුම් චතුරංග)

පුරාවිද්‍යා වටිනාකම් සහිත ඉඩම් භූමිය පරීක්ෂාකරන ස්කෑනර් යන්ත්‍රයක් භාවිතයෙන් පරීක්ෂාකළ පුද්ගලයින් පස් දෙනකු නවීන ස්කෑනර් යන්ත්‍රයක් හා කැබ් රථයක් සමඟ අද (28)  වවුනියාව නගරයේදී අත්අඩංගුවටගත් බව පොලිස් විශේෂ කාර්ය බලකාය පවසයි.

මඩුකන්ද පොලිස් විශේෂ කාර්ය බලකා කඳවුරේ නිලධාරීන් වෙත ලැබුණ බුද්ධි තොරතුරක් මත සිදුකළ වැටලීමකදී සැකකරුවන් , ඔවුන් පැමිණි කැබ්රථය හා ස්කෑනර් යන්ත්‍රය අත්අඩංගුවටගත් බව පොලිසිය පැවසීය.

විශේෂ කාර්ය බලකාය පැවසූයේ සැකකරුවන් ප්‍රදේශයේ පුරාවිද්‍යා වටිනාකම් සහිත ස්ථාන රැසක භූගත වස්තූන් සොයා ස්කෑනර් යන්ත්‍රයෙන් පරීක්ෂාකොට ඇති බවට තොරතුරු ලැබීතිබූ බවත්ය.

නිධන් සොයමින් අදාල පිරිස එම ස්ථානයන් හි පරීක්ෂා කිරීම් සිදුකරන්නට ඇති බවට සැකපලකරන බවත් සඳහන් කළේය.

සැකකරුවන් පිරිස මුල්ලේරියාව , පුත්තලම , මල්වාන හා දොම්පෙ ප්‍රදේශයේ පදිංචි අවුරුදු 55ත් 40 අතර වයසේ පසුවන්නෝ වෙති.

අත්අඩංගුවටගත් සැකකරුවන් පිරිස හා ස්කෑනර් යන්ත්‍රය ඉදිරි නීතිමය ක්‍රියාමාර්ග සඳහා වවුනියාව මූලස්ථාන පොලිසිය වෙත භාරදීමට නියමිතව තිබුණි.

මඩුකන්ද පොලිස් විශේෂ කාර්ය බලකාය , වවුනියාව පොලිසිය සිද්ධිය සම්බන්ධයෙන් වැඩිදුර විමර්ශන සිදුකරයි.