( තිළිණි ද සිල්වා සහ රංජන් කටුගම්පොළ )

පාර්ලිමේන්තුවේ විශේෂ බහුතරයේ ඉල්ලීම මත පාර්ලිමේන්තුව විසුරුවා හැරීම හෝ වසර හතරහමාරකට පසුව පාර්ලිමේන්තුව විසුරුවාලීමට ජනාධිපතිට  බලය තිබුණත් මේ දෙයාකාරයට හැරුණු විට පාර්ලිමේන්තුව විසුරුවා හැරීමේ බලයක් ජනාධිපතිවරයාට ආණ්ඩුක්‍රම ව්‍යවස්ථාවෙන් පැවරී නැතැයි ජනාධිපති නීතිඥ ඊ.කන ඊශ්වරන්  මහතා අද (04) ශ්‍රේෂ්ඨාධිකරණය හමුවේ කීය.

ජනාධිපතිවරයාට ආණ්ඩුක්‍රම ව්‍යවස්ථාවේ ව්‍යවස්ථාපිතව පැවරී ඇති  වගකීම් අනුව ආණ්ඩුක්‍රම ව්‍යවස්ථානුකූලව කටයුතු කිරීම, ව්‍යවස්ථාව ආරක්ෂා කිරීම, ජාතියේ සමගිය සහ සංහිඳියාව ඇතිවන පරිදි කටයුතු කීරීමට බැදී සිටින්නේ යැයි ජනාධිපති නීතීඥවරයා වැඩිදුරටත් කීවේය.

ජනාධිපති මෛත්‍රීපාල සිරිසේන මහතා විසින් පාර්ලිමේන්තුව විසුරුවා හරිමින් නිකුත් කළ ගැසට් නිවේදනය බලරහිත කරන ලෙස ඉල්ලා ශ්‍රේෂ්ඨාධිකරණයට ඉදිරිපත් වී ඇති පෙත්සම් අගවිනිසුරු  ප්‍රමුඛ සත් පුද්ගල විනිසුරු මඩුල්ලක් හමුවේ විභාග කිරීම ආරම්භ කළ අවස්ථාවේ පෙත්සම්කාර දෙමළ ජාතික සන්ධානය වෙනුවෙන් මෙම කරුණු දැක්වීම කළේය.

අගවිනිසුරු නලින් පෙරේරා මහතා එම විනිසුරු මඩුල්ලේ ප්‍රධානියා ලෙස කටයුතු කරයි.එම විනිසුරු මඬුල්ලේ සෙසු සාමාජිකයින් ලෙස ‍බුවනෙක අළුවිහාරේ ,ප්‍රියන්ත ජයවර්ධන, ප්‍රසන්න ජයවර්ධන, සිසිර ද ආබෘ, විජිත් මළල්ගොඩ සහ මුර්දු ප්‍රනාන්දු යන විනිසුරුවරු කටයුතු කරති.

ජනාධිපති  විසින් පාර්ලිමේන්තුව විසුරුවා හැරීම නීතිවිරෝධී යැයි ප්‍රකාශ කරන මෙන් ඉල්ලා එක්සත් ජාතික පක්ෂය, දෙමළ ජාතික සන්ධානය , ජනතා විමුක්ති පෙරමුණ ,ශ්‍රී ලංකා මුස්ලිම් කොංග්‍රසය, ශ්‍රී ලංකා මහජන කොංග්‍රසය ඇතුළු පාර්ශව 13ක් විසින් පෙත්සම ඉදිරිපත් කර තිබෙන අතර පෙත්සම්කාර පාර්ශවවල වැඩිදුර කරුණු දැක්වීම් තවදුරටත් සිදු කෙරෙමින් පවතී.