(සුජිත් හේවාජුලිගේ )

එළැඹෙන උත්සව සමයේදී කොවිඩ් ව්‍යාප්තිය පාලනය  කිරීමේ පූර්ව සැලසුමක් ලෙස  අධි මාත්‍රා එන්නත (Booster) ඉදිරි දෙසතියේදී  ලබාදී අවසන් කරන්නැයි ජනාධිපති ගෝඨාභය රාජපක්ෂ මහතා  කොවිඩ් මර්දන විශේෂ කමිටු සාමාජිකයන්ට  උපදෙස් දුන්නේය.

කොවිඩ්  මර්දන කමිටුව ජනාධිපති ගෝඨාභය රාජපක්ෂ මහතාගේ ප්‍රධානත්වයෙන් ජනාධිපති කාර්යාලයේදී අද පෙරවරුවේ රැස්විය .

දෙවන මාත්‍රාව  ලබාගෙන මාස 03ක් සම්පූර්ණ කළ සියලු දෙනා අධි මාත්‍රාව ලබාගැනීමට සුදුසුකම් ලබන බවත්   ඕනෑම ස්ථානයකින් හෙට   (11) සිට දිනපතා අධි මාත්‍රාව ලෙස ෆයිසර් එන්නත ගැනීමට අවස්ථාව සලසා ඇති බවත්  කොවිඩ්  කමිටුව පවසයි.

මේදිනවල වාර්තාවන කොවිඩ් ආසාදිතයන්ගෙන් ඉහළ ප්‍රතිශතයක් එන්නත නොගත් අය බවත් ඉන් බහුතරය තරුණ පිරිස බවත්  සෞඛ්‍ය අංශ නිලධාරීහු මෙහිදී පෙන්වා දුන්හ.

කොවිඩ් ආසාදිතව අසාධ්‍යවීම සහ  මරණ සංඛ්‍යාව අවම කරගැනීමට එන්නත ලබාගැනීම වැදගත් බව පැවසූ ජනාධිපතිවරයා   මේ පිළිබඳ තරුණ පිරිස් දැනුවත් කර ඔවුනට කඩිනමින් එන්නත ලබාදීමට පියවර ගන්නැයි උපදෙස් දුන්නේය.

වයස අවුරුදු 16ත් 19ත් අතර දරුවන්ට දෙවන මාත්‍රාව සහ 12ත් 15ත් අතර සියලු දරුවන්ට පළමු මාත්‍රාව ලබාදීමට අනුමැතිය හිමිව ඇති හෙයින් අධ්‍යාපන අමාත්‍යාංශය සමග සැලසුම් කර එම එන්නත ලබාදීමට කඩිනමින් කටයුතු කරන්නැයිද ජනාධිපතිවරයා  උපදෙස් දුන්නේය.

සංචාරක ක්ෂේත්‍රයට පනවා ඇති සීමා තවදුරටත් ලිහිල් කිරීමට පියවර ගන්නා ලෙස ජනාධිපතිවරයා මෙහිදී වැඩිදුරටත් උපදෙස් දුන්නේය. සංචාරකයන්ගේ පැමිණීමේ වර්ධනයක් දක්නට ඇතැයි මෙහිදී අනාවරණය කෙරිණ.