(නිමල කොඩිතුවක්කු)

රට සුරක්ෂිත කරන රන් වැටක් ලෙස පෙනී සිටිමින් බලය ගත් ආණ්ඩුව සිය සැබෑ නිරුවත මේ වනවිටත්  ජනතාවට පෙන්වා අවසන් බව සමගි ජන බලවේගය නායක සහ විපක්ෂ නායක සජිත් ප්‍රේමදාස මහතා පැවසීය.

කෙටිකලක් තුළ දශක ගණනාවකට පිළිසකර කළ නොහැකි ව්‍යසනයක් ආණ්ඩුව විසින් රටට සිදුකර ඇතැයිද විපක්ෂ නායකවරයා නිවේදනයක් එක් කරමින් සඳහන් කරයි.

"මේ වනවිට ශ්‍රී ලංකාව වෙන්දේසි බිමක් බවට පත්ව තිබේ. වගකීමක් නැති පාලකයින් විසින් මුලු රටම අනතුර වෙත හෙළා තිබේ.විදේශිකයින්ට සහ ගජ මිතුරන්ට ජාතික සම්පත් කුණු කොල්ලයට විකුණා දමමින් මතු පරම්පරාවේ උරුමයන් වනසා දමා තිබේ.

බ්‍රිතාන්‍ය යුගයෙහි ඉදි වූ ඓතිහාසික වශයෙන් වැදගත් කොළඹ, කොටුවේ පිහිටි ගොඩනැගිලි කිහිපයක් දැනට ඒවායෙහි පවතින භාවිතයන්ගෙන් ඉවත් කොට පෞද්ගලික ආයෝජකයන් වෙත ලබාදීමේ යෝජනාවලියක් පිළිබඳව තොරතුරු අනාවරණය වෙයි. ඊනියා සංවර්ධනයක මුවාවෙන් අදාල මගඩිය සිදුවන බවද වාර්තා වෙයි.

මෙරට ජාතික සම්පත් එලෙස විනාශ කරන අතර වසර ගණනාවකට පිළිසකර කළ නොහැකි විනාශයක් මෙරට මුහුදු තීරයට, රටේ ආර්ථිකයට මෙන්ම පරිසර පද්ධතියටද සිදු කරමින් නෞකාවක් ද විනාශ විය. මේරට සුරක්ෂිත කරන රන් වැටක් ලෙස පෙනී සිටිමින් බලය ගත් ආණ්ඩුව සිය සැබෑ නිරුවත මේ වනවිටත් පෙන්වා අවසන් ය.

කෙටිකලක් තුළ දශක ගණනාවකට කළ නොහැකි ව්‍යසනයක් ආණ්ඩුව විසින් රටට සිදුකර ඇති අතර ඉතාම බරපතල කොරෝනා ව්‍යසනය පාලනයේදී ද හුදෙක් සංදර්ශන හැර ප්‍රායෝගික තත්ත්වය අවාසනාවන්ත ය" යැයි ද එහි සඳහන්ය.