(විනීතා එම් ගමගේ)
 
මධ්‍යම තැපැල් හුවමාරුවට ලැබී තිබූ, හිමිකරුවන් ඉදිරිපත් නොවූ පාර්සලයක් විවෘත කිරීමේ දී මත් පෙති විශාල ප්‍රමාණයක් තිබී හමුවී ඇතැයි නියෝජ්‍ය තැපැල්පති (මෙහෙයුම්) රාජිත රණසිංහ මහතා ලංකාදීපයට පැවැසීය.    
 
මීට මාස කිහිපයකට පෙර එය බෙල්ජියමෙන් එවා තිබිණි. එම පාර්සලයේ දේශීය ලැබුම්කරු දන්වා ඇතත් එය ව්‍යාජ ලිපිනයක් වීම නිසා තැපැල් දෙපාර්තමේන්තුවේ හා ශ්‍රී ලංකා රේගුවේ නිලධාරින්ගෙන් යුත් කමිටුවක් ඉදිරියේ එම පාර්සලය විවෘත කිරීමේ දී මත් පෙති විශාල තොගයක් හමුවූ බව ඒ මහතා සඳහන් කළේය.
 
සත්ව ආහාර හා චොක්ලට් සහිත එම පාර්සලයේ සූක්ෂම ලෙස රඳවාගෙන ආ මත් පෙති රේගු බාරයට ගෙන පරීක්ෂණ පවත්වන බවත් මේ වනවිට එම පෙති ප්‍රමාණය ගණනය කරමින් ඇති බවත් රණසිංහ මහතා කියා සිටියේය.
 
විදේශ රටවලට යවන හා විදේශ රටවලින් එවන සියලු පාර්සල් තැපෑලේ ඇති විශේෂ එක්ස් කිරණ යන්ත්‍ර වලින් පරීක්ෂා කරන අතර එසේ පරික්ෂාවෙන් පසු සැක කටයුතු පාර්සලයක් ලෙස වෙන් කර තිබු එකක් බවත් එහෙත් හිමිකරු සොයා ගැනීමට උත්සාහ කළ බවත් කී නියෝජ්‍ය තැපැල්පතිවරයා හිමිකරු නොමැති බැවින් පාර්සලය විවෘත කළ බවත් ඔහු සඳහන් කළේය.
 
මේ සම්බන්ධව ශ්‍රී ලංකා රේගුව වැඩිදුර පරික්ෂණ පවත්වනු ඇතැයි රණසිංහ මහතා තවදුරටත් පැවසීය.

(ඡායාරූප - ඉන්දිකා රාමනායක)