(ඉන්දිකා රාමනායක)

අලුත් අවුරුදු  සමය තුළ  සිදුවන රිය අනතුරු අවම කර ගැනීම සඳහා  බීමත් රියදුරන් අත්අඩංගුවට ගැනීමට විශේෂ මෙහෙයුමත් හෙට (11) දින සිට 20 වැනි දින දක්වා දින 10 ක කාලක්  දිවයින පුරා කි‍්‍රයාක්මක  කර ඇති බව  පොලිස් මාධ්‍ය ප‍්‍රකාශක පොලිස් අධිකාරි රුවන් ගුණසේකර මහතා පැවසීය.

අපේ‍්‍රල් මස මාරක රිය අනතුරු බහුල වශයෙන් සිදුවන මාසයක් බවත් ඉන් වැඩිම  රිය අනතුරු සිදුවන්නේ  බීමත් රියදුරන් අතින් බවද   රුවන් ගුණසේකර මහතා කියා සිටියේය.

2016 වසරේ අපේ‍්‍රල් මාසය තුළ සිදු වු  මාරක රිය අනතුරු වලින් පුද්ගලයන් 268 දෙනෙක් ද,  2017 වසරේ 320 දෙනෙක් ද,  2018 වසරේ 296  දෙනෙක් ද, මියගොස් සිටි බව  ගුණසේකර මහතා සඳහන් කළේය.

මෙම තත්ත්වය වළක්වා ගැනීම සඳහා  දිවයින පුරා මෙම මෙහෙයුම් ආරම්භ කර ඇති අතර  බීමත්  රියදුරුන් පරීක්ෂා කිරීම සඳහා  ස්වසන පරීක්ෂණ නළ 25000 ක්   මෙරටට ගෙන්නා ඇති   බවත් ඒවා දිවයින පුරා පොලිස් ස්ථාන වෙත බෙදා  දී ඇති බවද හෙතෙම කියා සිටියේය.

බීමත් රියදුරන් අත්අඩංගුවට ගැනීම සඳහා  සිදුකළ මෙහෙයුම් වලින්  2016 වසරේ  බීමත් රියදුරන් 56835 දෙනෙක් අත්අඩංගුවට ගෙන ඇති  අතර, 2017 වසරේ රියදුරන් 72819  දෙනෙක් ද,  2018 වසරේ 105,094 දෙනෙක් ද,  2019 ගත වු ජනවාරි , පෙරවාරි මාස දෙක තුළ 19342 ක්  අත්අඩංගුවට ගෙන ඇති බවද පොලිස් මාධ්‍ය ප‍්‍රකාශකවරයා වැඩිදුරටත් පැවසීය.

පොලිස් මාධ්‍ය ප‍්‍රකාශක පොලිස් අධිකාරි රුවන් ගුණසේකර මහතා මේ බව සඳහන් කළේ පොලිස් මුලස්ථානයේ අද (10) පැවැති විශේෂ මාධ්‍ය හමුවකදීය.