(නිමල කොඩිතුවක්කු)

බදුල්ල සිට කොළඹ බලා ධාවනය වන රාත්‍රී තැපැල් දුම්රිය රියදුරන්  අතිකාල දීමනා ලබාගැනීමේ අරමුණින් බණ්ඩාරවෙල දුම්රිය  ස්ථානය දක්වා ගමන් කිරීම හිතාමතාම ප්‍රමාදකිරීම සම්බන්ධයෙන් ලංකාදීප පුවත්පත පසුගියදා (8) කළ අනාවරණයෙන් පසු ඒ පිළිබඳ  වහාම වාර්තාවක් කැඳවීමට   දුම්රිය සාමාන්‍යාධිකාරී ඩිලන්ත ප්‍රනාන්දු මහතා පියවර ගෙන ඇත.

දුම්රිය ප්‍රමාදය සිදුකිරිම සම්බන්ධයෙන් වහාම සොයා බලා වාර්තාවක් ලබාදෙන්නැයි දුම්රිය සාමාන්‍යාධිකාරීවරයා නාවලපිටිය ප්‍රවාහන අධිකාරී ඩබ්ලිව්. ජී. ඒ කරුණාරත්න මහතාට දැනුම්දී ඇත.

එම වාර්තාව ලැබීමෙන් පසු මේ සම්බන්ධයෙන් ඉදිරි ක්‍රියාමාර්ග ගන්නා බවද දුම්රිය සාමාන්‍යාධිකාරී ඩිලන්ත ප්‍රනාන්දු මහතා පැවසීය.

බදුල්ලෙන් පස්වරු 5.50ට කොළඹ බලා ධාවනය වන දුම්රිය පස්වරු 7.30ට බණ්ඩාරවෙලට පැමිණීමට නියමිතව තිබුණත් දිනපතාම එම දුම්රිය බණ්ඩාරවෙළ දුම්රිය ස්ථානයට ලඟා වනවිට රාත්‍රී 8.30 පසුවන බවට මගීහු චෝදනා කළහ.

බදුල්ල සිට  බණ්ඩාරවෙළ දුම්රිය ස්ථානයට කිලොමීටර් 35ක දුරකින් සමන්විත අතර බොහෝ ස්ථානවල දුම්රිය වේග සීමා ඉවත්කර  තිබියදීත් මෙලෙස දුම්රිය හිතාමතා ප්‍රමාද කර ධාවනය කර ඇති බවද ඔවුහු සදහන් කරති.

බණ්ඩාරවෙළ දුම්රිය ස්ථානයෙන් දුම්රිය රියදුරන් මාරුවන අතර එම රියදුරු සහ සහායක කොළඹින් බදුල්ල බලා ධාවනය වන රාත්‍රී තැපැල්  දුම්රිය බණ්ඩාරවෙළින් රැගෙන පසුවදා උදෑසන යළි බදුල්ල බලා ධාවනය වීමට නියමිතය.

දුම්රිය ප්‍රමාද වී බණ්ඩාරවෙල බලා රැගෙන එනවිට  විට එම දුම්රිය රියදුරුට සහ සහයකට පසුවදා උදෑසන වනතෙක් අතිකාල දීමනා ගෙවන බැවින් ඔවුන් මෙසේ හිතාමතාම දුම්රිය ප්‍රමාද කර ධාවනය කරන බවද වාර්තා වේ.

මේ හේතුවෙන් දුම්රිය කොළඹ බලා ධාවනය කිරීමට ප්‍රමාද වන අතර එම මාර්ගයේ සියලුම දුම්රිය වලටත් මෙම ප්‍රමාදය බලපානු ලබයි.