(නිමන්ති රණසිංහ)
 
‘පොලිස් ඥාති සංසදය’ නැමැති සංවිධානයක් විසින් හෙට (12) කොටුව ජනාධිපති ලේකම් කාර්යාලය ඉදිරිපිටදී සංවිධානය කර ඇති උද්ඝෝෂණ ව්‍යාපාරය තහනම් කරන ලෙසට නියෝගයක් නිකුත් කරන්නැයි කොටුව පොලීසිය කළ ඉල්ලීමක් කොළඹ කොටුව මහේස්ත‍්‍රාත් රංග දිසානායක මහතා අද (11) ප‍්‍රතික්ෂේප කළේය.
 

ආණ්ඩුක‍්‍රම ව්‍යවස්ථාවේ ඇති අයිතියක් වැළැක්වීමට අධිකරණයෙන් නියෝග නිකුත් කළ නොහැකි බවත්, යම් හෙයකින් උද්ඝෝෂකයින් එම අයිතිය උල්ලංඝණය කරමින් කටයුතු කළ හොත් පොලිස් බලතල පාවිච්චි කරන ලෙසත් දැනුම් දෙමින් මහේස්ත‍්‍රාත්වරයා කොටුව පොලීසියට කළ ඉල්ලීම ප‍්‍රතික්ෂේප කළේය.
 
පොලිස් නිලධාරින්ගේ සංයුක්ත දීමනා සහ මෑතකදී කණීෂ්ඨ නිලධාරින්ට ලබාදුන් උසස්වීම්වල ඇති අක‍්‍රමිකතා සම්බන්ධයෙන් ‘පොලිස් ඥාති සංසදය’ විසින් හෙට (12) කොටුව ජනාධිපති ලේකම් කාර්යාලය ඉදිරිපිටදී උද්ඝෝෂණ ව්‍යාපාරයක් පැවැත්වීමට කටයුතු යොදා ඇති බවට බුද්ධි තොරතුරු ලැබී ඇතැයි කොටුව පොලිසිය අද (11) අධිකරණයට කරුණු වාර්තා කරනු ලැබීය.