(තරිදු ජයවර්ධන)

රට අර්බුදයකට යාමට ඉඩ නොතබා ප්‍රජාතන්ත්‍රවාදයේ නාමයෙන් පාර්ලිමේන්තුව වහා කැඳවන ලෙස කතානායක කරූ ජයසූරිය මහතා ජනාධිපති මෛත්‍රීපාල සිරිසේන මහතාගෙන් ලිපියක් මගින් ඉල්ලා තිබේ.

පාර්ලිමේන්තු මන්ත්‍රීවරුන්ගේ වරප්‍රසාද හා අයිතිවාසිකම් ආරක්ෂා කරගැනීමට හා බහුතරය ස්ථාපිත කිරීමට වහා පියවර ගන්නැයි එක්සත් ජාතික පක්ෂය ඇතුළු පක්ෂ හතරක් තමාගෙන් ඉල්ලා ඇතැයිද එම ලිපියේ සදහන් වෙයි.

එම ඉල්ලීම ඉටු කිරීමට නම් පාර්ලිමේන්තුව කැඳවා බහුතරය ඇති පක්ෂයට බලය පැවරිය යුතු බවත් එසේ නොකරන්නේනම් එය ප්‍රජාතන්ත්‍රික අයිතිය පැහැර හැරීමක් බවද කතානායකවරයා සදහන් කරයි.

දින 18කින් පාර්ලිමේන්තුව අක්‍රීය කිරීම ප්‍රජාතන්ත්‍රවාදය සහ යහපාලනය සදහා වරම්ලබාගත් ජනපතිවරයා අතින් සිදුවීම විශ්වාස කළ නොහැක්කක් බවද කතානායකවරයා එම ලිපියෙන් දැනුම් දී ඇත.